सूत्रांनी दिलेल्या माहितीनुसार, अशपाक हा ३५वर्षीय युवकाच्या बहिणीच्या मोबाइलवर मेसेज पाठवित होता. यावरून त्यांच्यात वाद सुरू होता. दोन दिवसांपूर्वी ३५वर्षीय युवकाने एका मित्राच्या माध्यमातून अशपाकला बोलाविले. अशपाक हा कोराडी मार्गावरील एका बारमध्ये गेला. तेथे युवकाने व त्याच्या दोन मित्रांनी त्याला मारहाण केली. त्यानंतर तिघे अशपाकला घेऊन कोराडी मार्गावरीलच रेल्वेरुळाजवळ आले. तेथेही तिघांनी त्याला मारहाण सुरू केली. अशपाकने त्यांच्या तावडीतून सुटका केली. जीव वाचविण्यासाठी तो रेल्वे रुळावर धावायला लागला. त्याच्यामागे ३५वर्षीय युवकही धावला. याचदरम्यान मागाहून येणाऱ्या रेल्वेने आधी ३५वर्षीय युवकाला धडक दिली. नंतर रेल्वेखाली चिरडल्या गेल्याने अशपाकचा मृत्यू झाला. यात युवकाचा पाय कटला. जखमी युवकाला खासगी हॉस्पिटलमध्ये दाखल करण्यात आले. चौकशीदरम्यान ही घटना समोर आली. तूर्त पोलिसांनी आकस्मिक मृत्यूची नोंद केली आहे. सखोल चौकशीनंतर पुढील कारवाई करण्यात येईल, अशी माहिती कोराडी पोलिस स्टेशनचे वरिष्ठ पोलिस निरीक्षक विजय नाईक यांनी दिली.

जावयाने केली मेहुण्याची हत्या

नागपूर : जावयाने लहान मेहुण्याच्या मदतीने दारू पिऊन गोंधळ घालणाऱ्या मोठ्या मेहुण्याची विळ्याने व काठीने वार करून हत्या केली. ही घटना देवलापार पोलिस स्टेशन हद्दीतील पिंडकापार येथे घडली. नरेश जयसिंग वरठी (वय ३०) असे मृतकाचे नाव आहे. पोलिसांनी खुनाचा गुन्हा दाखल करून संजय श्रीराम इनवाते (वय ४०) व महेश जयसिंग वरठी (वय २७) या दोघांना अटक केली. संजय हा नरेशचा जावाई आहे. रविवारी रात्री नरेश हा दारू पिऊन संजयच्या घरी आला. यावेळी संजय व महेश हे दोघे बाहेर गेले होते. दारू पिऊन नरेशने गोंधळ घालायला सुरुवात केली. घरातील साहित्य बाहेर फेकले. यावेळी संजय व महेश घरी आले. संजय याने विळ्याने तर महेश याने काठीने नरेशच्या शरीरावर आणि डोक्यावर वार केले. नरेशचा मृत्यू झाला. पोलिसांनी खुनाचा गुन्हा दाखल करून दोघांना अटक केली.