पुणे : पुणे विमानतळावर (लोहगाव) प्रवाशांना सुलभ ‘चेक-इन’साठी सुरू केलेल्या ‘डिजि यात्रा’ सुविधेचा वापर २५ टक्क्यांपर्यंत पोहोचला आहे. गेल्या महिन्यात या सुविधेच्या वापराच्या प्रमाणात दुपटीने वाढ झाली असून पुणे हे देशातील सात शहरांमध्ये तिसरे शहर ठरले आहे. विमानतळावर प्रवेशासाठी ‘प्रवाशांचा चेहरा हाच पासपोर्ट,’ अशी सेवा असलेली ‘डिजि यात्रा’ सुविधा नागरी हवाई वाहतूक मंत्रालयाने सुरू केली आहे.
ही सुविधा पहिल्या टप्प्यात दिल्ली, वाराणसी, बंगळुरू येथे प्रायोगिक तत्त्वावर डिसेंबर २०२२मध्ये सुरू करण्यात आली. दुसऱ्या टप्प्यात पुणे, वाराणसी, कोलकता, दिल्ली, हैदराबाद, विजयवाडा येथील विमानातळावर तिचा वापर सुरू झाला. एक एप्रिलपासून ही सुविधा पूर्ण क्षमतेने सुरू करण्यात आली. या सुविधेमुळे गर्दी असणाऱ्या विमानतळांवर प्रवाशांना दिलासा मिळतो.
ही सुविधा पहिल्या टप्प्यात दिल्ली, वाराणसी, बंगळुरू येथे प्रायोगिक तत्त्वावर डिसेंबर २०२२मध्ये सुरू करण्यात आली. दुसऱ्या टप्प्यात पुणे, वाराणसी, कोलकता, दिल्ली, हैदराबाद, विजयवाडा येथील विमानातळावर तिचा वापर सुरू झाला. एक एप्रिलपासून ही सुविधा पूर्ण क्षमतेने सुरू करण्यात आली. या सुविधेमुळे गर्दी असणाऱ्या विमानतळांवर प्रवाशांना दिलासा मिळतो.
अशी आहे डिजि यात्रा प्रणाली
– ‘डिजि यात्रा’ ही मोबाइल अॅप केंद्रित प्रणाली आहे. प्रवाशांना आधार-आधारित पडताळणीद्वारे अॅपवर तपशील नोंदवावा लागतो.
– त्यानंतर सेल्फी अपलोड करावा लागेल. अॅप वापरादरम्यान, प्रवाशाचे बायोमेट्रिक तपशील घेतले जातील.
– नोंदणी झाल्यानंतर विमानतळावर प्रवाशाला चेक-इनसाठी वेळ लागणार नाही. प्रवाशांचा चेहरा स्कॅन केल्यानंतर संबंधित प्रवाशाने विमानतळ टर्मिनलमध्ये प्रवेश केल्याची नोंद होते.
– प्रवासी ‘सिक्युरिटी चेक-इन’ करताना सेंट्रल इंडस्ट्रियल सिक्युरिटी फोर्सचे (सीआयएसएफ) जवान संबंधित प्रवाशाचे स्कॅन केलेले छायाचित्र आणि तिकिटाची पडताळणी करतात. यामध्ये प्रवाशांचा वेळ वाचतो.
पुणे विमानतळावरील स्थिती
पुण्यातून दिवसाला १८० उड्डाणे होतात. त्याद्वारे २६ ते २८ हजार प्रवासी प्रवास करतात. जून अखेरपर्यंत पुणे विमानतळावर १,०४,००० प्रवाशांनी डिजि यात्रा अॅपचा वापर केला. हे प्रमाण एकूण प्रवाशांच्या तुलनेत ११.९० टक्के होते; पण, जुलैमध्ये ते २५ टक्क्यांपर्यंत वाढले. पुणे विमानतळावर दोन विमान कंपन्यांकडून डिजि यात्रा सुविधेचा वापर अद्याप केला जात नाही. त्यांना ही सुविधेसाठी परवानगी मिळाल्यास ती वापरणाऱ्यांची संख्या आणखी वाढेल.
‘डिजि यात्रा’ वापराची जूनपर्यंची स्थिती
शहर एकूण प्रवासी डिजि यात्रा वापरणारे प्रवाशांची टक्केवारी
विजयवाडा ९१३१३ ४६६६८ ५१.११ टक्के
पुणे ८७५०९१ १०४१३३ ११.९० टक्के
कोलकता १६७५३१५ १८०३६१ १०.७७ टक्के
वाराणसी २६९२३७ १५२५८५ ५६.५७ टक्के
दिल्ली ४८०३३५८ ४६५५९१ ९.६९ टक्के
हैदराबाद २०८१४०० ३७१३३ १.७८ टक्के
बेंगळुरू २९५७५४७ ३१३४६४ १०.६० टक्के
पुणे विमानतळावरील दोन प्रवेशद्वारांवर ‘डिजि यात्रा’ सेवा सुरू आहे. सध्या दिवसाला २५ टक्क्यांपेक्षा अधिक जास्त नागरिक डीजी यात्रा सुविधेचा वापर करत आहेत. येत्या काळात ही सेवा वापरणाऱ्यांची संख्या निश्चित वाढेल. -संतोष डोके- संचालक, लोहगाव विमानतळ