पुणे : ‘आयुष्मान भारत डिजिटल मिशन’चा (आभा) एक भाग म्हणून केंद्र सरकारने डिजिटल हेल्थ कार्ड (आभा आरोग्य खाते) हा उपक्रम सुरू केला आहे. सर्व नागरिकांनी आभा कार्डसाठी नोंदणी करावी, असे आवाहन राज्याच्या आरोग्य विभागाने केले आहे. रुग्णांची सर्व माहिती एकाच ठिकाणी आणि डिजिटल स्वरूपात मिळावी म्हणून आभा कार्ड सुरू करण्यात आले आहे. कार्डवर रुग्णांचा वैद्यकीय इतिहास, चाचण्या केलेले उपचार आदी माहिती साठविली जाणार आहे.
आभा हेल्थ कार्डचे फायदे
आभा हेल्थ कार्डचे फायदे
– उपचारांसाठी प्रत्यक्ष अहवाल, कागदपत्रे घेऊन जाण्याची गरज नाही.
– आभा कार्डमध्ये ब्लड ग्रुप, आजार, याची संपूर्ण माहिती असेल.
– मिशन अंतर्गत प्रत्येक व्यक्तीसाठी युनिक हेल्थ कार्ड बनविले जाणार आहे.
– ऑनलाइन उपचार, टेलिमेडिसीन, ई-फार्मसी, पर्सनल हेल्थ रेकॉर्ड या सुविधा मिळतील.
– वैद्यकीय अहवाल मेडिकल इन्शुरन्स कंपनीला शेअर करता येईल.
आवश्यक कागदपत्रे
– आधार कार्ड
– आधार लिंक मोबाइल क्रमांक
आभा आरोग्य कार्ड कसे काढावे ?
– नॅशनल डिजिटल हेल्थ मिशनच्या संकेतस्थळ healthid.ndhm.gov.in वर जावे.
– होम पेजवर क्रिएट आभा नंबर असे बटन असेल, त्यावर क्लिक करावे.
– पुढच्या पेजवर आयुष्मान भारत हेल्थ अकाउंट (आभा) तयार करण्यासाठी दोन पर्याय दिसतील.
– आधार कार्ड आणि वाहतूक परवान्याचा वापर करून हेल्थ कार्ड तयार करता येते.
– आधार कार्डला मोबाइल नंबर लिंक नसेल तर वाहतूक परवान्याचा पर्याय निवडावा.
२ कोटी ४४ लाख कार्डची नोंदणी
राज्यात आतापर्यंत २ कोटी ४४ लाख नागरिकांनी आभा हेल्थ कार्डची नोंदणी केली आहे. जास्तीत जास्त नागरिकांनी नोंदणी करावी यासाठी आरोग्य विभागाच्या वतीने जनजागृती करण्यात येत असल्याचे आरोग्य सेवा विभागााने सांगितले.