म. टा. प्रतिनिधी, पुणे : शहरात वाहनखरेदीचा वेग गेल्या वर्षात वाढल्याचे दिसून आले आहे. करोनाकाळाच्या तुलनेत गेल्या वर्षी वाहनांची विक्री वाढली असून, सध्या पुणे शहरात एकूण ३५ लाख ९४ हजार १३२ वाहने आहेत. त्यापैकी दोन लाख ५५ हजार ७५७ वाहनांची गेल्या वर्षी भर पडली आहे.
महापालिकेने ‘पर्यावरण सद्यस्थिती २०२२-२३ अहवाल’ बुधवारी प्रसिद्ध केला. त्यामध्ये पुण्यातील वाहनांची सविस्तर माहिती देण्यात आली आहे. शहरात २०२२ अखेरपर्यंत ३५ लाख ९४ हजार वाहने होती. करोनाकाळात मंदावलेला वाहनखरेदीचा वेग २०२१मध्ये वाढला. यंदा आतापर्यंत एक लाख ६९ हजार ५५२ वाहनांची खरेदी झाली आहे. गेल्या वर्षी (२०२२) दोन लाख ५५ हजार ७५७ वाहनांची खरेदी झाली होती. वाहनांची संख्या वाढत असल्यामुळे शहरातील वाहतूक कोंडीत भर पडते आहे.
महापालिकेने ‘पर्यावरण सद्यस्थिती २०२२-२३ अहवाल’ बुधवारी प्रसिद्ध केला. त्यामध्ये पुण्यातील वाहनांची सविस्तर माहिती देण्यात आली आहे. शहरात २०२२ अखेरपर्यंत ३५ लाख ९४ हजार वाहने होती. करोनाकाळात मंदावलेला वाहनखरेदीचा वेग २०२१मध्ये वाढला. यंदा आतापर्यंत एक लाख ६९ हजार ५५२ वाहनांची खरेदी झाली आहे. गेल्या वर्षी (२०२२) दोन लाख ५५ हजार ७५७ वाहनांची खरेदी झाली होती. वाहनांची संख्या वाढत असल्यामुळे शहरातील वाहतूक कोंडीत भर पडते आहे.
‘ई-बस’ची कोटीत उड्डाणे
‘पीएमपी’च्या ताफ्यात सध्या ४५८ ‘ई-बस’ आहेत. या बसचा डिसेंबर २०२२ अखेर ३.५० कोटी किलोमीटरपेक्षा अधिक प्रवास झाला आहे. ‘पीएमपी’च्या ताफ्यातील १,४२१ बस ‘सीएनजी’वरील आहेत.
अहवालातील ठळक बाबी
– गर्दीच्या वेळी वाहनांचा वेग ताशी ः १८ किलोमीटर.
– सार्वजनिक वाहतुकीचे प्रमाण ः १९ टक्के
– शहरातील नागरिकांचे सरासरी प्रवासाचे अंतर ः आठ किलोमीटर
शहरातील वाहनविक्री
वर्ष २०१९
दोन लाख ३९ हजार ६६०
वर्ष २०२०
एक लाख ४९ हजार २३५
वर्ष २०२१
एक लाख ६९ हजार ५५२
वर्ष २०२२
दोन लाख ५५ हजार ७५७
कचरानिर्मिती २२०० टनांवर
शहरात सध्या दररोज २१०० ते २२०० टन कचरा तयार होत आहे. यात ९५० टन ओल्या कचऱ्याचा समावेश आहे. त्यावर प्रक्रिया करून कंपोस्टिंग, बायोगॅस, बल्क वेस्ट जनरेटर; तसेच कॉम्प्रेस्ड बायोगॅसचा वापर ‘पीएमपी’साठी इंधन म्हणून केला जातो. सुक्या कचऱ्यावरही प्रक्रिया केली जात आहे. गेल्या वर्षभरात ६२ ई-वेस्ट संकलित करण्यात आले आहे.