म. टा. खास प्रतिनिधी, मुंबई : सांताक्रुझ पूर्वेला कलिना मुंबई विद्यापीठाजवळील एका तलावात बुडून १३ वर्षीय मुलाचा मृत्यू झाला. इकबाल मन्सुरी असे त्याचे नाव असून, वांद्रे-कुर्ला संकुल पोलिसांनी अपमृत्यूची नोंद केली आहे.
काय घडलं?
काय घडलं?
कलिनातील मुंबई विद्यापीठाच्या विद्यानगरी गेट क्रमांक एकजवळील डक पॉइंटच्या तलावात इकबाल आणि त्याचे दोन मित्र रविवारी दुपारी पावणे तीन वाजण्याच्या सुमारास पोहण्यासाठी गेले होते. इकबाल आणि एक मित्र पोहोण्यासाठी तलावात उतरले. तर तिसरा तलावाच्या काठावरच उभा राहिला. यावेळी पाण्याचा अंदाज न आल्याने इकबाल बुडू लागला.
सोबत पोहत असलेल्या मित्राने त्याला वाचवण्याचा प्रयत्न केला, मात्र तो त्याला वाचवू शकला नाही. त्यामुळे मित्रांनी जवळच असलेल्या सुरक्षा रक्षकांना ही माहिती सांगितली. त्यांनी तातडीने अग्निशमन दल आणि पोलिसांना याबाबत माहिती दिली. त्यानंतर अग्निशमन दलाचे जवान तातडीने घटनास्थळी दाखल झाले आणि त्यांनी इकबालला बाहेर काढले. त्याला तत्काळ व्ही. एन. देसाई रुग्णालयात दाखल केले. मात्र, तिथे त्याला मृत घोषित केले.
शॉक लागून एकाचा मृत्यू
सांताक्रुझ पूर्वेला कलिना कुर्ला रोड येथे शॉक लागून एका ४५ वर्षीय व्यक्तीचा मृत्यू झाला. येथे एक मजली इमारत आहे. दुपारच्या वेळेस खासगी जागेतील गटाराची सफाई सुरू होती. त्याचवेळी इमारतीच्या तळमजल्याच्या बाहेर असलेल्या इलेक्ट्रिक मोटरच्या वायरचा शॉक या व्यक्तीला लागला. त्याला तत्काळ सांताक्रुझमधील नर्सिंग होममध्ये दाखल करण्यात आले. मात्र उपचारादरम्यान त्याचा मृत्यू झाला. उशिरापर्यंत त्याचे नाव समजू शकले नाही.