सिराज शेख हे भागीदारीत गॅरेज चालवतात. रविवारी सकाळी नेहमीप्रमाणे ते गॅरेजवर आले होते. दरम्यान, वैभव पुजदेकर हे त्यांच्या दुचाकीचे टायर बदलण्यासाठी गॅरेजमध्ये आले होते. सिराज टायर बदलत असताना वैभव त्यांच्या उजव्या बाजूला बसलेले होते. या वेळी अज्ञात व्यक्तीने त्यांच्या दिशेने ॲसिड फेकले.

या हल्ल्यात सिराज यांच्या कपाळावर, गालावर, खांद्यावर, पाठीवर व डाव्या पायावर ॲसिड पडले, तर वैभव यांच्या गालावर व हातावर ॲसिड उडाले. अचानक झालेल्या या प्रकारामुळे परिसरात एकच खळबळ उडाली. आरडाओरडा ऐकून स्थानिकांनी पोलिसांना माहिती दिली. पोलिसांनी तत्काळ घटनास्थळी धाव घेऊन दोघांना उपचारासाठी घाटी रुग्णालयात दाखल केले. या प्रकरणी सिराज शेख यांनी दिलेल्या तक्रारीवरून जवाहर कॉलनी पोलिस ठाण्यात गुन्हा दाखल करण्यात आला आहे असून पुढील तपास सुरू आहे.

काय झालं हेच समजले नाही
ॲसिडमुळे धूर निघू लागल्याने काही काळ परिसरात शॉर्टसर्किट झाल्याचा समज झाला. त्यामुळे नागरिकांमध्ये गोंधळ उडाला. नेमके काय झाले, हे समजलेच नाही. या हल्ल्यानंतर अंगाला तीव्र जळजळ होत असल्याने त्यांनी शेजारील मिठाईच्या दुकानात धाव घेतली. तेथील नळ सुरू करून त्यांनी अंगावर पाणी घेतले आणि काही वेळ तेथेच बसून राहिल्याचे प्रत्यक्षदर्शींनी सांगितले. घटनेची माहिती मिळताच पोलिस निरीक्षक सचिन कुंभार यांनी घटनास्थळी भेट देऊन परिसरातील सीसीटीव्ही फुटेजची पाहणी केली. प्राथमिक तपासात हा हल्ला पूर्वनियोजित असल्याचा संशय व्यक्त केला जात आहे.