मृतदेहाची ओळख पटवण्यासह आठ दिवसात खुनाचा तपास लावण्यात इंदापूर पोलिसांना यश आले आहे. अनोळखी वाहनातून प्रवास करणे सबंधित तरुणाच्या जीवावर बेतले. यामध्ये पैसे व मोबाईलसाठी उच्च शिक्षित तरुणांनी त्याचा खून केल्याचे निष्पन्न झाले आहे. मृत व्यक्तीचा मृतदेह इंदापूरमध्ये सरडेवाडी येथील ऊसाच्या शेतात आढळला होता.

सदर प्रकरणी अज्ञात इसमा विरोधात इंदापूर पोलिस ठाण्यात गुन्हा नोंद करण्यात आला होता. याप्रकरणाचे कसले ही धागेदोरे नसताना तपास करणे पोलिस यंत्रणेसमोर आव्हान होते. सदर गुन्हयाचे गांभीर्य ओळखून पोलीस अधिक्षक अंकित गोयल सो, अप्पर पोलीस अधिक्षक आनंद भोईटे, उपविभागीय पोलीस अधिकारी गणेश इंगळे, पोलिस निरीक्षक दिलीप पवार यांनी तपास पथकास मार्गदर्शन केले.

याबाबत अधिक माहिती अशी की, बुधवार १२ जुलै रोजी पहाटे सरडेवाडी शिवारातील गलांडवाडी रोडवरील उसाच्या शेतात एका अनोळखी व्यक्तीचा गळा आवळून तसेच डोक्यात दगड मारून अत्यंत क्रूरपणे खून करून फेकलेला मृतदेह आढळला. या घटनेचे गांभीर्य ओळखून उपविभागीय पोलिस अधिकारी गणेश इंगळे, पोलिस निरीक्षक दिलीप पवार, सहायक पोलीस निरीक्षक योगेश लंगुटे, प्रकाश पवार, सहाय्यक फौजदार प्रकाश माने, सुनिल बालगुडे पो. हवालदार ज्ञानेश्वर जाधव, सचिन बोराडे यांच्या पथकाने घटनास्थळी जावून मृतदेह तसेच आजूबाजूच्या परिसराची सखोल पाहणी केली.

प्रदीप हा ११ जुलै रोजी रात्री साडेअकराच्या वाजताच्या सुमारास बालेवाडी, पुणे येथील नातेवाईकांना भेटून सोलापूर येथील बहिणीकडे निघाल्याची माहिती नातेवाईकांकडून मिळाली होती. प्रदीपचा व्यक्तीचा खून हा आर्थिक व्यवहार, अनैतिक संबंध यातून झालेला वाटत होते. परंतू तपासामध्ये तसे काहीही दिसून येत नव्हते तसेच तो कोणत्या वाहनाने सोलापूर येथे निघाला होता याबाबत काहीही माहिती नव्हती. तरीही तपास पथकाने सलग ६ दिवस रात्र तपास करून पुणे, हडपसर, कुरकुंभ, पाटस, कुंजीरवाडी, टेंभुर्णी, कुर्डवाडी, सोलापूर येथील सीसीटिव्हीचे फुटेज तपासले. परंतू रात्रीची वेळ असल्याने वाहनाच्या लाईट सुरू असल्यामुळे तसेच प्रदीप हा कोणत्या वाहनाने सोलापूर येथे निघाला होता. याबाबत माहिती नसल्याने तपासात अनेळ अडथळे येत असताना ही काही सीसीटिव्हीचे फुटेज व तांत्रिक माहितीवरुन तपास केला.

यातील आरोपींनी ६ जुलै रोजी उदगिर, जि. लातूर येथून इर्टीगा गाडी भाडयाने घेवून ते स्वत: गाडी चालवून हैद्राबाद, अक्कलकोट, गाणगापूर, जेजूरी, पुणे असा प्रवास करून ११ जुलै रोजी रात्री ११: ५० च्या सुमारास पुणे येथून लातूर येथे निघाले होते. त्याच वेळी प्रदीप हा हडपसर गाडीतळ येथून सोलापूर येथे जाण्यासाठी थांबला होता. त्यास सोलापूर येथे सोडतो असे बोलून गाडीमध्ये बसवले. प्रदीपकडील पैसे व मोबाईल घेण्यासाठी त्यास मारहाण करून गाडीतीलच रस्सीने गळा आणि संपूर्ण शरीराला बांधण्यात आले. नंतर गाडीतून उचलून सरडेवाडी शिवारातील गलांडवाडी रोडवरील ऊसाच्या शेतात डोक्यात मोठा दगड मारून त्याचा खून केल्याचे तपासात निष्पन्न झाले.