अखेर आज वीजगर्जनेसह दमदार पावसाला सुरुवात झाली. सकाळपासूनच हा पाऊस सुरू होता. मुसळधार पावसामुळे शहरातील जनजीवन प्रभावित झाले आहे. आज सकाळपासूनच चंद्रपुरात मुसळधार पाऊस सुरू आहे. या पावसामुळे शहरातील रस्त्यावरून नदी पात्रासारखे पाणी वाहत आहे. ठक्कर कॉलनी, महसूल कॉलनीत पाणी शिरले आहे. गांधी चौकात असलेला शहरातील मुख्य गोलबाजार जलमय झाला आहे. सर्वत्र पाणी वाहत असल्याने वाहनाचा रांगाच रांगा दिसत. अद्यापही पावसाचा जोर ओसरला नाही. चंद्रपूर शहराला पावसाने अक्षरश: झोडपून काढले आहे. शहरातील अनेक रस्ते जलमय झाले आहेत, तर ठक्कर, महसूल कॉलनीतील अनेक घरात पाणी शिरले आहे.

चंद्रपूर जिल्ह्यात आज झालेल्या अतिवृष्टीमुळे आणि भारतीय हवामान खात्याने वर्तविलेल्या अंदाजानुसार उद्या (बुधवार) चंद्रपूर जिल्ह्यात मुसळधार पाऊस पडण्याची शक्यता वर्तविण्यात आली आहे. अतिवृष्टीत कोणत्याही प्रकारची अनुचित घटना घडू नये, तसेच आपत्कालीन परिस्थिती निर्माण झाल्यास त्याचा परिणाम शालेय विद्यार्थ्यांवर होऊ नये, याकरिता जिल्ह्यातील सर्व अंगणवाड्या, पूर्व प्राथमिक, प्राथमिक, माध्यमिक शाळा, विद्यालय व महाविद्यालय यांना उद्याला (१९ जुलै) सुट्टी जाहीर करण्यात आली आहे. याबाबतचे आदेश जिल्हाधिकारी विनय गौडा यांनी निर्गमित केले.