जगदीश मुळीक यांची वाटचाल राष्ट्रीय स्वयंसेवक संघाच्या मुशीत झाली आहे. त्यानंतर त्यांना २०१४ च्या विधानसभेसाठी भाजपकडून वडगाव शेरी मतदारसंघातून उमेदवारी मिळाली. मोदी लाटेचा फायदा घेत मुळीक यात विजयी झाले. मात्र २०१९ ला जागा राखण्यात त्यांना अपयश आले. त्यानंतर त्यांची २०२० ला शहराध्यक्षपदी निवड झाली. मात्र आता २०२४ च्या विधानसभेची तयारी करत असतानाच अजितदादांमुळे समीकरणं बदलली आहे. जगदीश मुळीकांना आव्हान देऊन आमदार झालेल्या सुनिल टिंगरेंनी अजितदादांना साथ दिली आहे. त्यामुळे जगदीश मुळीकांची गोची झाली आहे. तसेच आता आगामी निवडणुकीतील उमेदवारीवरून संभ्रम तयार झाला आहे.

सुनिल टिंगरेंनी मनसेतून राजकारणात प्रवेश केला. त्यानंतर २०१४ ला शिवसेनेकडून विधानसभेची उमेदवारी मिळवली मात्र वडगावशेरीत मुळीक वरचढ ठरले. त्यानंतर २०१७ च्या महानगर पालिका निवडणुकीत ते विजयी झाले. २०१९ ला अजित दादांनी राष्ट्रवादीत प्रवेश देत उमेदवारी दिली. पुण्यात भाजपची ताकद असतानाही टिंगरेंनी जागा खेचली. सुनिल टिंगरेंच्या विजयाने मुळीकांच्या विजयाची पुनरावृत्ती हुकली. २०१९ ला पुण्यात एकहाती वर्चस्व राखण्याचा भाजपचा मनसुबा होता. पण सुनिल टिंगरेंनी जगदीश मुळींकांना घरी बसवून भाजपच्या प्रयत्नांवर पाणी फेरले. राज्यात मविआ सरकार आल्यानंतर मतदारसंघात सुनिल टिंगरेंनी वर्चस्वाचं राजकारण केलं.
विरोधी पक्षनेता काँग्रेसचा होणार? शरद पवारांची संमती? या दोन नावांची चर्चा
आताही अजितदादांना साथ दिल्याने टिंगरेंकडून ताकद वाढवण्याचे प्रयत्न केले जातील. पण टिंगरेंनी अजितदादांना साथ दिल्याने जगदीश मुळीकांची असुरक्षितता वाढली आहे. पुणे लोकसभेसाठी इच्छुक असणाऱ्या मुळीकांची आता आपल्याच होमपीचवर कोंडी झाली आहे. लोकसभेची उमेदवारी मिळाली नाही तर विधानसभेच्या उमेदवारीसाठीच मुळीकांना संघर्ष करावा लागले. बाकी आमदार होण्यासाठीची लढाई नंतरचा हा मुद्दा असेल. पुण्याच्या राजकारणात टिकायचं झालं, तर २०२४ ला विधानसभेत वापसी करणं, मुळीकांसाठी गरजेचं आहे. पण अजितदादांमुळे बदललेल्या समीकरणांमुळे जगदीश मुळीकांसमोरच कोड वाढलं आहे. अजित दादांच्या एन्ट्रीनं भाजप नेत्यांची कोंडी वाढलीये असं वाटतं का?