जळगाव : जळगाव जिल्ह्यातील रावेर मतदारसंघात लोकसभेच्या निवडणुकीत सर्वच प्रमुख पक्ष आपले उमेदवार देणार असल्याने या मतदारसंघात आतापासून जोरदार रस्सीखेच सुरु आहे. यातच माजी विधान परिषद आमदार मनीष जैन यांनी रावेर मतदारसंघातून लोकसभा निवडणूक लढवण्याची इच्छा व्यक्त केली आहे. शरद पवार यांच्या नेतृत्वात विधान परिषद आमदार झालेल्या मनीष जैन यांनी राष्ट्रवादी काँग्रेसमध्ये दोन गट पडल्यानंतर आता अजित पवार यांना पाठिंबा दिला आहे. त्यामुळे उपमुख्यमंत्री अजित पवार यांनी उमेदवारी दिल्यास रावेर मतदारसंघात लोकसभेच्या निवडणुकीच्या रिंगणात उतरणार असल्याचे मनीष यांनी जाहीर केलं आहे. मनीष जैन यांना उमेदवारी मिळाल्यास ते २०१४ मध्ये झालेल्या लोकसभेच्या निवडणुकीत भाजपच्या खासदार रक्षा खडसेंनी केलेल्या पराभवाचा वचपा काढणार असल्याची चर्चा रंगू लागली आहे.
राष्ट्रवादी काँग्रेस पक्षात फूट पडल्यानंतर अजित पवार यांच्यासह काही आमदारांनी सरकारमध्ये सहभागी होत मंत्रिपदाची शपथ घेतली. राष्ट्रवादीत पडलेल्या फुटीमुळे राज्यातले राजकारण चांगलंच ढवळून निघालं आहे. शरद पवार यांची साथ सोडून अनेकांनी अजित पवार यांना पाठिंबा दर्शविला आहे. यात जळगाव जिल्ह्यातही शरद पवार समर्थकांनी अजित पवारांना साथ दिल्याचं पहायला मिळत आहे. यातलं एक नाव म्हणजे माजी विधानपरिषद आमदार मनीष जैन.२०१४ पासून राजकारणापासून अलिप्त मनीष जैन होणार पुन्हा सक्रीय
राष्ट्रवादी काँग्रेस पक्षात फूट पडल्यानंतर अजित पवार यांच्यासह काही आमदारांनी सरकारमध्ये सहभागी होत मंत्रिपदाची शपथ घेतली. राष्ट्रवादीत पडलेल्या फुटीमुळे राज्यातले राजकारण चांगलंच ढवळून निघालं आहे. शरद पवार यांची साथ सोडून अनेकांनी अजित पवार यांना पाठिंबा दर्शविला आहे. यात जळगाव जिल्ह्यातही शरद पवार समर्थकांनी अजित पवारांना साथ दिल्याचं पहायला मिळत आहे. यातलं एक नाव म्हणजे माजी विधानपरिषद आमदार मनीष जैन.
मनीष हे माजी खासदार ईश्वरबाबुजी जैन यांचे चिरंजीव आहेत. शरद पवार यांच्या नेतृत्वात मनीष जैन यांनी एकदा विधान परिषद आणि एकदा खासदारकीची निवडणूक लढवली आहे. मात्र शरद पवार यांना सोडून अजित पवार यांनी सत्तेत सहभाग घेतल्यानंतर मनीष जैन यांनी अजित पवारांना साथ दिली. अजित पवार यांच्यासोबत शपथ घेतलेल्या मंत्री अनिल भाईदास पाटील यांच्यासोबत काल मनीष जैन हे रावेर तालुक्याच्या दौऱ्यावर असल्याचं पहायला मिळालं. सायंकाळी मंत्री अनिल पाटील यांनी पत्रकार परिषदेत मनीष जैन हे अजित पवार यांच्यासोबत असल्याचं स्पष्ट केलं.
गेल्या काही दिवसांपासून मनीष जैन हे राजकारणापासून अलिप्त असल्याचं पहायला मिळालं होतं. काल मनीष जैन यांनी अजित पवारांना पाठिंबा दिला आणि पुन्हा राजकारणात सक्रीय होण्याचे संकेत दिले आहेत. मनीष जैन यांनी रावेर मतदारसंघातून लोकसभा निवडणूक लढविण्याची इच्छा व्यक्त केली आहे. मनीष जैन यांच्या राजकीय पार्श्वभूमीचा विचार करता, त्यांनी राष्ट्रवादी काँग्रेसकडून २००९ मध्ये जळगाव शहर मतदारसंघातून विधानपरिषद आमदारकीची निवडणूक लढविली होती. या निवडणुकीत मनीष जैन यांच्या विरोधात राजकारणातील मातब्बर नेते एकनाथ खडसे यांचे चिरंजीव हे निखील खडसे हे भाजपकडून निवडणुकीच्या रिंगणात होते. मात्र या निवडणुकीत मनीष जैन यांनी निखिल खडसे यांचा पराभव करत पहिल्यांच निवडणुकीत आमदारकी मिळवली होती.
आता तर रूपाली चाकणकरही बोलल्या; शरद पवारांना केला अडचणीचा सवाल, माझ्याच बाबतीत असं का वागलात?
त्यावेळी स्थानिक राजकारणात हा खडसे कुटुंबासाठी मोठा धक्का होता. त्यानंतर मनीष जैन यांनी राष्ट्रवादी काँग्रेसकडून २०१४ मध्ये खडसेंचा बालेकिल्ला असलेला रावेर मतदारसंघातून लोकसभेची निवडणूक लढवली. लोकसभेत भाजपच्या उमेदवार रक्षा खडसे यांचा पराभव करुन एकनाथ खडसेंना दुसरा धक्का देण्याची तयारी जैन पिता-पुत्रांकडून झाली. मात्र मनीष जैन यांना अपयश आलं. या निवडणुकीत रक्षा खडसे यांनी मनीष जैन यांचा पराभव करत पती निखील खडसे यांच्या २००९ मध्ये मनीष जैन यांनी केलेल्या पराभवाचा वचपा घेतला.
२०१४ पासून राजकारणापासून अलिप्त मनीष जैन होणार पुन्हा सक्रीय
२०१४ च्या निवडणुकीनंतर मनीष जैन हे राजकारणापासून अलिप्त असल्याचं दिसून आलं. त्यानंतर त्यांनी एकही निवडणूक लढविली नाही. ते आपल्या व्यवसायात व्यस्त झाल्याचं पाहायला मिळालं. नुकतीच राष्ट्रवादी फूट पडली, यात अजित पवार व शरद पवार असे दोन गट पडले. यात माजी आमदार मनीष जैन यांनी अजित पवार यांना पाठिंबा देत राष्ट्रवादीच्या अजित पवार गटात मनीष जैन हे सहभागी झाले आहे.
अखेर ठरलं! शरद पवारांच्या हस्ते उद्घाटन झालेल्या ‘या’ कार्यालयातून चालणार अजित पवार गटाचे कामकाज
या माध्यमातून मनीष जैन यांनी पुन्हा राजकारणात सक्रीय होण्याचे संकेत देत लोकसभा निवडणूक लढण्याची इच्छा व्यक्त केली आहे. २०१४ साली लोकसभेच्या निवडणुकीत ज्या रावेर मतदारसंघात मनीष जैन यांचा पराभव झाला, त्याच रावेर मतदारसंघातून अजित पवार यांनी उमेदवारी दिल्यास पूर्ण ताकदीनिशी निवडणूक लढवणार असल्याचं मनीष जैन यांनी जाहीर केलं आहे.
खडसेंच्या सूनबाई रक्षा खडसेंचं तिकीट कापणार?
सध्या रावेर मतदारसंघात गेल्या दोन टर्मपासून भाजपच्या रक्षा खडसे या खासदार आहेत. रक्षा खडसे या एकनाथ खडसेंच्या सूनबाई आहेत. दुसरीकडे भाजपचे देवेंद्र फडणवीस आणि एकनाथ खडसे हे एकमेकांचे कट्टर राजकीय विरोधक आहेत. त्यामुळे यंदा रक्षा खडसे यांच भाजपकडून तिकिट कापलं जाणार असल्याची चर्चा राजकीय वर्तुळात चर्चा आहे, तसे संकेत सुद्धा भाजपचे मंत्री गिरीश महाजन यांनी दिले आहेत. आता राष्ट्रवादीला भाजप व शिंदे गटाने सोबत घेतल्याने आगामी काळातील निवडणुकांमधील राजकीय समीकरण कशी असतील हे आत्ताच सांगता येणार नाही.
एकनाथ खडसेंना नामोहरम करण्यासाठी भाजपकडून त्यांच्या सून खासदार रक्षा खडसे यांचं तिकिट भाजपकडून कापलं जाऊ शकतं. याच मतदारसंघात राष्ट्रवादीचे अजित पवार गटाचे माजी आमदार मनीष जैन यांना लोकसभेची उमेदवारी देण्यात देवून भाजप मोठी खेळी खेळण्याची शक्यता आहे. याठिकाणी मनीष जैन यांना विजयी करण्यासाठी भाजप, शिवसेना शिंदे गट हे एकत्र येतील, आणि मनीष जैन यांच्या उमेदवारीच्या माध्यमातून एकनाथ खडसेंना त्यांच्या बालेकिल्ल्यात घेरण्याचा आणि मोठा धक्का देण्याची तयारी भाजपकडून सुरु असल्याची चर्चा आहे.
एकंदरीत खडसे विरुद्ध सर्वच असाच सामना या ठिकाणी रंगणार असल्याचं चित्र आहे. त्याला मातब्बर नेते एकनाथ खडसे हे किती पुरून उरतात, हे सुद्धा आगामी काळात पाहणं महत्त्वाचं असणार आहे. मात्र मनीष जैन यांच्या उमेदवारीच्या माध्यमातून खडसेंना शह देण्यासाठी मोठी रणनीती भाजपकडून आखली जाऊ शकते, आणि त्यामुळे मनीष जैन यांनी लोकसभा निवडणूक लढविण्याची इच्छा व्यक्त केल्याचेही बोलले जात आहे.
या कारणांमुळे रावेर लोकसभा मतदारसंघाची निवडणूक ठरणार हायव्होल्टेज
लोकसभेच्या निवडणुकीला बराच अवकाश आहे. मात्र या निवडणुकीपूर्वीच वेगवेगळ्या मतदारसंघामध्ये उमेदवारीबाबतची समीकरणं जुळवण्याची तयारी वेगवेगळ्या पक्षांकडून सुरु आहे. अशाच पद्धतीने जळगाव जिल्ह्यातील रावेर मतदारसंघात सुद्धा लोकसभा निवडणुकीच्या पार्श्वभूमीवर वातावरण चांगलं असल्याचं पहायला मिळत आहे. महाविकास आघाडीतील राष्ट्रवादी आणि काँग्रेस, तर दुसरीकडे भाजप, शिंदेंची शिवसेना असे सर्वच प्रमुख पक्ष याठिकाणी लोकसभेच्या निवडणुकीत उमेदवार देण्याच्या तयारीत असल्याने याठिकाणी चांगलीच रस्सीखेच सुरु आहे.
या मतदारसंघात भाजपच्या विद्यमान खासदार रक्षा खडसे आहेत, असे असताना भाजप सोबत सरकारमध्ये सहभागी झालेला मित्रपक्ष असलेल्या अजित पवार गटाच्या राष्ट्रवादीच्या माजी आमदाराने निवडणूक लढविणार असल्याचे संकेत दिले आहेत. ऐनवेळी नेमक्या काय राजकीय घडामोडी घडतात हे आत्ताच सांगणं अशक्य आहेत, मात्र सध्या तरी सर्वच प्रमुख पक्षांमधील रस्सीखेच आणि मनीष जैन यांचे उमदेवारीचे संकेत, तर दुसरीकडे एकनाथ खडसेंचा बालेकिल्ला या सर्व गोष्टींचा विचार करता २०२४ मध्ये होणारी रावेर लोकसभा मतदारसंघाची लोकसभेची निवडणूक चांगलीच हायव्होल्टेज होणार हे मात्र निश्चित.