म. टा. विशेष प्रतिनिधी, नाशिक : महापालिकेतील पदोन्नती घोटाळ्याच्या कथित आरोपांमुळे चर्चेत आल्यानंतर; महिनाभरापूर्वी बदली झालेल्या प्रशासन विभागाचे उपायुक्त मनोज घोडे-पाटील, यांच्या बदलीनंतरही प्रशासन विभागाचा कारभार त्यांच्याच सहीने चालत असल्याचे धक्कादायक वास्तव आहे. प्रशासन विभागाने चार जुलै २०२३ रोजी काढलेल्या सेवाप्रवेश नियमावलीच्या परिपत्रकावर, नूतन प्रशासनाधिकारी लक्ष्मीकांत साताळकर यांच्या स्वाक्षरीऐवजी महिनाभरापूर्वी बदली झालेल्या घोडे पाटलांची स्वाक्षरी असल्याने अधिकारी-कर्मचारी संभ्रमात पडले आहेत.
या सगळ्या प्रकारामुळे प्रशासन विभागाचा कारभार संशयाच्या भोवऱ्यात सापडला असून ‘प्रभारीराज’चा फायदा घेऊन अधिकारी, कर्मचारी आपले हित साध्य करून घेत असल्याचे चित्र आहे. या प्रकारामुळे महापालिकेच्या प्रशासन विभागात अद्याप ‘घोडे’ दामटण्याचेच काम सुरूच असल्याचे चित्र आहे.
या सगळ्या प्रकारामुळे प्रशासन विभागाचा कारभार संशयाच्या भोवऱ्यात सापडला असून ‘प्रभारीराज’चा फायदा घेऊन अधिकारी, कर्मचारी आपले हित साध्य करून घेत असल्याचे चित्र आहे. या प्रकारामुळे महापालिकेच्या प्रशासन विभागात अद्याप ‘घोडे’ दामटण्याचेच काम सुरूच असल्याचे चित्र आहे.
महापालिकेत सध्या दोन महिन्यांपासून प्रभारीराज सुरू आहे. आजी-माजी पालकमंत्र्यांच्या वादात पूर्णवेळ आयुक्त मिळत नसल्यामुळे महापालिकेचा कारभार भरकटल्याचे आणखी धक्कादायक चित्र समोर आले आहे. महापालिकेत मे महिन्यात पदोन्नतीचा घोटाळा समोर आला होता. या कथित पदोन्नती घोटाळ्यामुळे उपायुक्त मनोज घोडे-पाटील चर्चेत आले होते. पदोन्नती घोटाळ्याची व्याप्ती वाढत असतानाच घोडे-पाटील यांची जूनच्या पहिल्या आठवड्यात बदली झाली होती. बेकायदेशीर नियमावलीच्या आधारे घोडे-पाटील यांनी मर्जीतील अधिकारी, कर्मचाऱ्यांना पदोन्नती दिल्याने पात्र कर्मचाऱ्यांवर अन्याय झाल्याचा आरोप होता.
या पदोन्नती मोठ्या प्रमाणावर आर्थिक व्यवहारही झाल्याचा आरोप झाला होता. त्यामुळे शिवसेनेचे (शिंदे गट) जिल्हाप्रमुख अजय बोरस्ते, महानगरप्रमुख प्रवीण तिदमे यांनी या विरोधात मुख्यमंत्री एकनाथ शिंदेंकडे धाव घेत, घोडे-पाटील यांच्या उपायुक्तपदाच्या कार्यकाळात झालेल्या कामकाजाची चौकशीची मागणी केली होती. या मागणीची दखल घेत मुख्यमंत्री शिंदे यांनी चौकशीचे आदेशही जारी केले होते. महापालिकेला नियमित आयुक्त न मिळाल्याने घोडे-पाटील यांच्या कामकाजाच्या चौकशीला अद्याप मुहूर्त लाभू शकलेला नाही. त्यामुळे पदोन्नती घोटाळ्यात पात्र कर्मचाऱ्यांवर झालेला अन्याय कायम राहिला असताना, त्यांच्या बदलीनंतर महिनाभरानंतरही त्यांच्याच स्वाक्षरीने प्रशासन विभागाचा कारभार सुरू असल्याने खळबळ उडाली आहे.
आजारी वडिलांना भेटायला आली, टेरेसवरुन मोठा आवाज, बघितलं तर महिला फूट लांब उडाली, अन्…
प्रशासनातील ‘कलेक्टर’ चर्चेत
सेवाप्रवेश नियमावलीसंदर्भात महापालिकेच्या प्रभारी आयुक्त भाग्यश्री बाणायत यांच्या स्वाक्षरीचे परिपत्रक ४ जुलै रोजी जारी करण्यात आले आहे. त्यानंतर त्यांच्या आदेशाने काढण्यात आलेल्या परिपत्रकावर प्रशासन उपायुक्त म्हणून महिनाभरापूर्वी शासन प्रतिनियुक्तीवर नियुक्त झालेले लक्ष्मीकांत साताळकर यांची स्वाक्षरी असणे अपेक्षित होती. मात्र, या परिपत्रकावर साताळकर यांच्याऐवजी घोडे-पाटील यांची स्वाक्षरी आहे. यामुळे आस्थापना विभागाचा कारभार संशयाच्या भोवऱ्यात आला आहे. प्रशासनातील घोडे पाटील यांचे ‘कलेक्टर’ आता चर्चेत आले आहेत.
कारभाराविषयी संशय
पदोन्नती घोटाळ्याचे आरोप आणि मुख्यमंत्र्यांच्या चौकशीच्या आदेशांनंतरही घोडे-पाटील यांचा निरोप समारंभ महापालिकेत जोरदारपणे साजरा करण्यात आला होता. घोडे-पाटील यांच्या बदलीला महिनाभरापेक्षा अधिक कालावधी उलटल्याने आस्थापना विभागाने नूतन उपायुक्त साताळकर यांची स्वाक्षरी असलेले सुधारित परिपत्रक आयुक्तांच्या मान्यतेसाठी सादर करणे अपेक्षित होते. आस्थापना विभागातील अधिकाऱ्यांचा हलगर्जीपणा या गोंधळास कारणीभूत ठरला असून, एकूणच प्रशासनाच्या कारभाराविषयी संशयाचे वातावरण तयार झाले असताना प्रशासनाकडून आता सारवासारव केली जात आहे.
या परिपत्रकाची संचिका उपायुक्त घोडे-पाटील यांच्या कार्यकाळात तयार झाली होती. ही संचिका आयुक्तांच्या स्वाक्षरीसाठी प्रलंबित होती. त्यामुळे त्यावर घोडे-पाटील यांची स्वाक्षरी असल्याचे दिसत आहे.
– लक्ष्मीकांत साताळकर, उपायुक्त(प्रशासन), महापालिका