डॉ. गोऱ्हेंचा शिंदे गटात प्रवेश पाहून सर्वांना आश्चर्य वाटलं आहे. ठाकरे गटातील प्रमुख नेत्या म्हणूनही नीलम गोऱ्हे यांच्याकडे पाहिलं जात होतं. भाजपसोबतची युती तुटल्यानंतर ठाकरेंची बाजू त्यांनी समर्थपणे सांभाळली होती. त्यांचा ठाकरे गटाला रामराम म्हणजे उद्धव ठाकरेंसाठी खूप मोठा धक्का आहे.
ठाकरे गटाला रामराम ठोकून नीलम गोऱ्हेंनी शिंदे गटात प्रवेश केला आहे. विधानभवनात शिवसेना पक्षकार्यालयात नीलम गोऱ्हेंनी पक्षप्रवेश केला आहे. पक्षप्रवेशाच्या कार्यक्रमाला मुख्यमंत्री एकनाथ शिंदेंसह, उपमुख्यमंत्री देवेंद्र फडणवीस तसंच उदय सामंत उपस्थित होते.
शिंदे गटाच्या शिवसेनेतील पक्षप्रवेशावेळी काय म्हणाल्या नीलम गोऱ्हे?
मुख्यमंत्री एकनाथ शिंदे यांच्या नेतृत्वाखाली शिवसेना योग्य मार्गावर महिला विकास, महाराष्ट्र आणि देश विकासाच्या प्रश्नांवर एकनाथ शिंदे यांच्यासोबत आणि देवेंद्र फडणवीस यांच्या सहकार्याने काम करण्याचा निर्णय घेतला असल्याचं पक्षप्रवेशावेळी नीलम गोऱ्हे म्हणाल्या.
हिंदुहृदयसम्राट बाळासाहेब ठाकरे यांच्या मार्गदर्शनानुसार शिवसेना पक्षात १९९८ मध्ये प्रवेश केला. शिवसेनेत मला चांगलं काम करता आलं. सद्यस्थितीत सुप्रीम कोर्ट आणि निवडणूक आयोगाने स्पष्ट निकाल दिला आहे, की एकनाथ शिंदे यांच्या नेतृत्वाखालील शिवसेनाच अधिकृत आहे. एकनाथ शिंदे आणि देवेंद्र फडणवीस यांच्या उपस्थितीत शिवसेनेचं समर्थन करते, असं नीलम गोऱ्हे पक्षप्रवेशावेळी म्हणाल्या.