Sharad Pawar : संकटकाळात शरद पवार वापरणार हुकमी अस्त्र; खास मर्जीतील नेत्यांनी सांगितला संपूर्ण प्लॅन

एप्रिल महिन्यात राष्ट्रवादीचे ज्येष्ठ नेते प्रफुल्ल पटेल यांच्या सीजे हाऊसमध्ये पार पडलेल्या एका गुप्त बैठकीत सरकारमध्ये सामील होण्यासंदर्भातील पहिली गंभीर चर्चा झाली. सरकारमध्ये जाताना पवार यांना दगा देऊन जाण्याऐवजी त्यांच्याशी चर्चा करण्याचे ठरले. ते सोबत येणार असतील तर त्यांच्यासोबत अन्यथा त्यांना सोडून राज्यातील सरकारमध्ये सहभागी होण्याबाबत ठरले. मात्र यावेळी यासाठीचा पुढाकार अजित पवार यांनी न घेता केंद्रीय तपास यंत्रणांकडून ज्यांना अडचणीत आणले जात आहे, त्यांनी पवारांपुढे बोलण्याचे ठरले. त्यानुसार छगन भुजबळ, हसन मुश्रीफ, प्रफुल्ल पटेल आदी नेत्यांनी बाजू मांडली. सुरुवातीला पवार यांनी आपण पक्षाच्या अध्यक्षपदावरून निवृत्त होतो, त्यानंतर तुम्हाला जो निर्णय घ्यायचा तो निर्णय घ्या, असे ठरवले होते. मात्र नंतर त्यांनी यासंदर्भात दोन-तीन दिवसांत निर्णय घेऊ असे सांगत बाजी पलटवली. कार्यकर्ते आणि पदाधिकारी यांच्या आग्रहाखातर अध्यक्षपद पुन्हा स्वीकारताना त्यांनी अजित पवार यांना जोरदार धक्का दिला.

दरम्यानच्या काळात देशातील एका बड्या उद्योगपतीनेही पवार यांना केंद्रातील भाजप नेतृत्वासोबत हातमिळवणी करण्याबाबत संवाद साधला होता. मात्र जे करायचे ते २०२४ नंतर, असे सांगत पवार यांनी संवाद थांबवला. दुसरीकडे अजित पवार यांनी मात्र सत्तेमध्ये सामील होण्याच्या संवादात खंड पडू दिला नाही. उपमुख्यमंत्री देवेंद्र फडणवीस यांच्या माध्यमातून त्यांनी संवाद सुरूच ठेवला. अलिकडेच पंतप्रधान नरेंद्र मोदी यांनी राष्ट्रवादी काँग्रेसवर भ्रष्टाचाराचे आरोप करताना शरद पवार यांच्या मुलीचे भले करायचे असेल तर राष्ट्रवादीला मत द्या, असे वक्तव्य केले होते. यावेळी त्यांनी अजित पवार वा शिवसेना (उद्धव बाळासाहेब ठाकरे) पक्षाचे नेते उद्धव ठाकरे यांचे नाव घेतले नव्हते.

या घडामोडी सुरू असतानाच आषाढी एकादशीला पंढरपूरची पूजा आटोपल्यावर अचानक मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांना दिल्लीत बोलावून घेत केंद्रीय गृहमंत्री अमित शहा यांनी राज्यातील सत्तेत अजित पवार आणि त्यांच्या समर्थक आमदारांना सहभागी करून घेण्याचा आदेश दिला. त्यानंतर ४८ तासांत घडामोडी घडल्या आणि सत्तानाट्याचा नवा प्रवेश पार पडला.