फिटनेस सर्टिफिकेटवर संशय?

त्यानंतर मार्च महिन्यात १० मार्च २०२३ रोजी अपघातग्रस्त बसला फिटनेस सर्टिफिकेट देण्यात आलं होतं. फिटनेस सर्टिफिकेट देताना याच्या तपासणीमध्ये वेग नियंत्रक यंत्र योग्यरित्या काम करत असल्याचंही सांगण्यात आलं होतं. बसला मिळालेलं फिटनेस सर्टिफिकेट १० मार्च २०२४ पर्यंत वैध असल्याची माहिती आहे.

बसला फिटनेस सर्टिफिकेट दिलं गेलं असलं, तरी त्या फिटनेस सर्टिफिकेटवर संबंधित मोटार वाहन निरिक्षकाचं नाव नाही. त्यामुळे यावरही संशय व्यक्त केला जात आहे. फिटनेस सर्टिफिकेटवर संशय व्यक्त होण्याशिवाय या बसला तब्बल ११ वेळा RTO कडून चालान देण्यात आले आहेत.

अपघातग्रस्त बसला कोणत्या कारणांसाठी चालान दिलेलं?

आरटीओकडून या बसला बसमध्ये क्षमतेपेक्षा अधिक प्रवासी बसवल्याबाबत चालान देण्यात आलं होतं. अधिक प्रवासी बसवल्याबाबत बसला ३ ते ४ वेळा हेच चालान लावण्यात आले. त्याशिवाय बसला टॅक्ससंबंधीत चालान, चालकाचा युनिफॉर्म नसणे, विंड स्क्रिनमध्ये काही दोष असे चालान देण्यात आले आहेत.

बस चालकावर गुन्हा दाखल

बुलढाणा जिल्ह्यातील समृद्धी महामार्गावर पिंपळखुटा येथे झालेल्या खाजगी बस लक्झरी अपघातात ३३ पैकी २५ जणांचा मृत्यू झाला, तर ८ जण बचावले. अपघातात बसचा ड्रायव्हर आणि क्लिनर बचावला आहे. आता या खाजगी बस विदर्भ ट्रॅव्हल्सच्या चालकाला पोलिसांनी ताब्यात घेतलं असून त्याच्यावर विविध कलमांतर्गत सिंदखेडराजा पोलीस स्टेशनमध्ये मोटर वाहन कायदा अन्वये गुन्हा दाखल करण्यात आला आहे. या अपघाताबाबत १४०/२३ , २७९ ३०४, ३३७, ३३८, ४२७ मोटरसायकल ॲक्ट १८४ अन्वये गुन्हा दाखल करण्यात आला आहे.