पालघर: दुकानात चालत जाणाऱ्या दोन चिमुकल्या बहीण- भावाचा अपघातात मृत्यू झाल्याचे दुर्दैवी घटना घडली आहे. पिकअप वाहनाने या चिमुकल्यांना धडक दिल्याने हा अपघात घडला असून पालघर जिल्ह्यातील मोडगाव येथे घडली आहे. प्रीती जयराम मालकरी (वय १२) आणि शाहिद जयराम मलकरी (वय ७) अशी मृत बहीण-भावाची नावे आहेत.
दुकानात जात असताना बहीण-भावाला पिकअपची धडक
दुकानात जात असताना बहीण-भावाला पिकअपची धडक
पालघर जिल्ह्यातील मोडगाव- खोरीपाडा परिसरात येथे मलकरी कुटुंबीय राहतात. या कुटुंबातील बारा वर्षांची चिमुकली प्रीती जयराम मालकरी आणि तिचा सात वर्षांचा सख्खा भाऊ शाहिद जयराम मलकरी हे दोघे दुकानात चालत जात होते. याचवेळी समोरून येणाऱ्या एका भरधाव पिकअप वाहनाने रस्त्याने चाललेल्या या दोन चिमुकल्यांना जोरदार धडक दिली. या पिकअप वाहनाच्या धडकेत दोनही चिमुकल्यांचा डोक्याला, हातपाय व कमरेला जबर इजा झाली आणि दोघेही गंभीर जखमी झाले. या अपघातात गंभीरित्या जखमी झालेल्या बहीण-भावाचा दुर्दैवी मृत्यू झाला आहे.
धडक दिल्यानंतर पिकअप वाहनचालक घटनास्थळावरुन फरार
चिमुकल्यांना धडक देऊन पिकअप वाहनचालक मात्र घटनास्थळावरून फरार झाला आहे. घटनेची माहिती मिळताच पोलीस घटनास्थळी दाखल झाले व घटनास्थळाचा पंचनामा करून मृतदेह ताब्यात घेण्यात आले. या अपघात प्रकरणी अज्ञात पिकअप वाहन चालकाचा शोध पोलीस घेत आहेत. अपघातात मृत चिमुकले शिवसेनेचे (शिंद गट) पालघरचे आमदार श्रीनिवास वनगा यांचे जवळचे नातेवाईक आहेत. भरधाव वाहनाच्या धडकेत दोन निष्पाप चिमुकल्यांचा मृत्यू झाल्याने मालकरी कुटुंबीयांवर दुःखाचा डोंगर कोसळला असून या घटनेमुळे आता परिसरात सर्वत्र हळहळ व्यक्त होत आहे.