कोल्हापूर : बीआरएस पक्षाकडून मलाही मुख्यमंत्रीपदाची ऑफर देण्यात आली होती. ते गेल्या चार ते पाच महिन्यांपासून आमच्या संपर्कात होते. शेतकऱ्यांचं राज्य असेल तर मुख्यमंत्रीपदाचा चेहरा म्हणून आम्ही तुम्हाला पुढे करू. तुम्ही आमच्या पक्षात या केंद्रीय कोर समितीच्या मंडळातही तुम्हाला सदस्यत्व देऊ, अशी ऑफर तेलंगणचे मुख्यमंत्री के. चंद्रशेखर राव यांच्याकडून आली होती. मात्र मला कोणत्याही पक्षात जायचं नसल्याने मी त्यांची ही ऑफर नाकारली, असा दावा स्वाभिमानी शेतकरी संघटनेचे नेते राजू शेट्टी यांनी केला. ते कोल्हापुरात पत्रकारांशी बोलत होते.
‘तर मुख्यमंत्रीपदाचा चेहरा म्हणून तुम्हाला पुढे करू’
‘तर मुख्यमंत्रीपदाचा चेहरा म्हणून तुम्हाला पुढे करू’
तेलंगणचे मुख्यमंत्री के. चंद्रशेखर राव हे हे तेलंगणामध्ये सलग दोन वेळा मुख्यमंत्री झाल्यानंतर आणि तेलंगणमध्ये विरोध करायला कोणताही विरोधक नाही हे पाहून आता ते संपूर्ण देशात पाय रोवण्यासाठी बाहेर पडले आहेत. सध्या त्यांनी महाराष्ट्रावर आपलं लक्ष केंद्रीत केलं आहे. यामुळे महाराष्ट्रातील राजकीय पक्षांना घाम फुटला आहे.
केसीआर यांनी आपल्या भारत राष्ट्र समिती पक्ष महाराष्ट्रात उभा करण्यासाठी अनेक नेते, माजी आमदार, खासदार यांना गळाला लावण्याचे काम सुरू केले आहे. दरम्यान, स्वाभिमानी शेतकरी संघटनेचे नेते राजू शेट्टी यांनाही मुख्यमंत्री पदाची ऑफर देण्यात आली होती, अशी माहिती स्वतः राजू शेट्टी यांनी पत्रकारांशी बोलताना दिली.
KCR Pandharpur Visit : राष्ट्रवादीने शेतकऱ्यांचे गळे दाबले, म्हणून NCPमधील नेते आमच्या पक्षात येत आहेत- BRS
के. चंद्रशेखर राव हे गेल्या अनेक वर्षांपासून आमचे मित्र आहेत. ते गेल्या चार ते पाच महिन्यांपासून आमच्या संपर्कात होते. महाराष्ट्रात शेतकऱ्यांचं राज्य असेल तर मुख्यमंत्रीपदाचा चेहरा म्हणून तुम्हाला पुढे करू, असे ते म्हणाले होते. तसेच तुम्ही आमच्या पक्षात प्रवेश करा. केंद्रीय कोर कमिटीच्या बोर्डामध्येही तुम्हाला सदस्यत्व देऊ, अशी ऑफर दिली होती. मात्र, मला कोणत्याही पक्षात जायचं नव्हतं. जर पक्षीय राजकारण करायचं असतं तर अगोदरच केलं असतं. मात्र आमची आधीच फसवणूक झाली आहे. यामुळे आम्ही आता पुन्हा कोणत्या पक्षात जाणार नाही. म्हणून मी त्यांना नकार दिला, असेही राजू शेट्टी म्हणाले.
‘सबका साथ, सबका विकास म्हणत एका मॉडेलने फसवणूक’
दरम्यान, राजू शेट्टी यांनी मोदी सरकारवरही निशाणा साधला. दहा वर्षांपूर्वी सबका साथ सबका विकास म्हणत गुजरात मॉडेल समोर आणले आणि आमची फसवणूक केली. सबका साथ सबका विकास तर सोडाच उलट शेतकऱ्यांच्या आत्महत्या वाढल्या. आता पुन्हा कोणत्याही पॅटर्नमुळे फसवणूक होणार नाही याची खात्री करून घेणे गरजेचे आहे, असे म्हणत तेलंगणा पॅटर्न बद्दल सुरू असलेल्या चर्चेवरही त्यांनी शंका उपस्थित केली. तसेच के चंद्रशेखर राव हे प्रामाणिकपणे त्यांचा अजेंडा चालवणार असतील तर त्याबद्दल आम्हाला सहानुभूती वाटेल हे सांगायला ते विसरले नाहीत.
‘पांडुरंगावरील निशीम भक्ती आहे की बेगडी हे दिसते’
दरम्यान, के. चंद्रशेखर राव हे मोठे शक्तिप्रदर्शन करत महाराष्ट्रात दाखल झाले. यावरही राजू शेट्टी यांनी टीका केली. अबकी बार किसान सरकार, असे तुम्ही म्हणत आहात मग इतका पैसा तुमच्याकडे कुठून आला? प्रामाणिकपणे तुम्ही काम करता तर एवढा पैसा खर्च करण्यासाठी कोठून आणला? याचे उत्तर त्यांनी द्यायला हवे. सामाजिक क्षेत्रात काम करणाऱ्या व्यक्तीने आपल्या सर्व काही लोकांना सांगितलं पाहिजेत. बीआरएस पक्षाकडे इतका पैसा कोठून आला? देणगीमधून आला की अन्य कोठून हे त्यांनी सांगावं? शिवाय पांडुरंग हे महाराष्ट्राचं आराध्य दैवत आहे. येथे लाखो भाविक तहानभूक विसरून पायपीट करत येतात आणि अशा वेळेस के. चंद्रशेखर राव यांच्याकडून करण्यात आलेली जेवणावळी आणि मटणावर मारण्यात आलेला ताव हे पांडुरंगावरील निशीम भक्ती आहे की बेगडी हे देखील दिसतं, असेही राजू शेट्टी म्हणाले.