स्मार्ट सिटीतल्या नागरिकांची पहिल्याच पावसाने फजिती केली
कोट्यवधी रुपयांचा खर्च करून सोलापूर शहरातील गावठाण भाग स्मार्ट सिटीत परिवर्तित होत आहे. यंदाचा मान्सून सुरू होण्याअगोदर स्मार्ट सिटी प्रशासनाने अनेक कामे पूर्ण केली आहे. पण शनिवारी सायंकाळी मान्सूनच्या पहिल्याच पावसाने दमदार हजेरी लावली आहे. शनिवारी आलेल्या पावसाने स्मार्ट सिटीतल्या नागरिकांची एकच तारांबळ उडाली होती. रस्त्यावर पाणीच पाणी साचले होते. सात रस्ता, मंगळवार बाजार परिसर, जोडभावी, बाळीवेस, बस स्थानक, विजापूर वेस परिसर आदी भागातील रस्त्यावर वाहनधारकांना मोठी कसरत करत वाहने हकावी लागली.
शहरातील अनेक घरांत पाणी; दुचाकी वाहने वाहून जाताना नागरिक धावले…
सोलापूर शहरातील कोनापुरे चाळ, रेल्वे स्टेशन परिसर, नई जिंदगी परिसरात अनेक घरांत पावसाचे पाणी शिरले होते. नालेसफाई न केल्याने घरांत पाणी आणि गटारीचे घाण पाणी घरात शिरले असा संताप अनेक नागरिक व्यक्त करत होते. कुटुंबातील लहान लेकरांपासून ज्येष्ठ नागरिक हे घरातील पाणी काढण्यात व्यस्त होते.
सोलापूर शहरातील मंगळवार बाजार परिसरात असलेल्या गणेश पेठ शॉपिंग सेंटर परिसरात नाले तुंबले होते. गणेश शॉपिंग सेंटर हे सोलापूर महानगरपालिकेने नाल्यावर बांधले आहे. शॉपिंग सेंटरसमोर पार्किंग केलेली वाहने ही पावसाच्या पाण्यात वाहून जात होती. नाल्याच्या दिशेने वाहून जाणाऱ्या वाहनांना दुचाकी धारक हे दोरीच्या साहाय्याने बाहेर काढत होते.