म. टा. प्रतिनिधी, नाशिक : जानेवारी महिन्यात दहीपूल परिसरात दोन टोळक्यांच्या सशस्त्र दंगलीनंतर पोलिसांनी शहरातील हालचालींच्या निरीक्षणासाठी सीसीटीव्ही कॅमेरे बसविण्यासंदर्भात केलेल्या सूचनेचे आस्थापनांनी स्वागत केले आहे. पोलिसांच्या ‘एक कॅमेरा नाशिकसाठी’ संकल्पनेंतर्गत शहर सुरक्षेसाठी आस्थापनानिहाय बसविलेल्या हजारो कॅमेऱ्यांचा गुन्हा उकल करण्यासह कायदा व सुव्यवस्थेसाठी पोलिसांना महत्त्वपूर्ण फायदा होत आहे.शहरातील सर्व पोलिस ठाण्यांच्या हद्दीत प्रभारी निरीक्षकांनी या संकल्पनेचा पाठपुरावा केल्याने दोन हजार सीसीटीव्ही नव्याने तैनात करण्यात आले आहेत. जानेवारी महिन्यात रात्री उशिरा दहीपूल-नेहरू चौक-धुमाळ पॉइंट रस्त्यावर वसुलीसह वर्चस्ववादातून दोन गटांत सशस्त्र दंगल झाली होती. दुकानांसह वाहनांची तोडफोड करून टोळक्याने एकाच्या खुनाचा प्रयत्न केला होता. या प्रकरणी भद्रकाली पोलिसांत दोन्ही टोळ्यांवर खुनाच्या प्रयत्नाचा गुन्हा दाखल करून चौदा संशयितांना अटक करण्यात आली होती.

एकाच ग्राहकाकडून ४२९ कोटींची फसवणूक; मास्टरमाईंडला ईडीकडून अटक; राज्यातील बँक दिवाळखोरीत
या घटनेमुळे भयग्रस्त झालेल्या व्यावसायिकांनी पोलिस आयुक्त अंकुश शिंदे यांच्यासह उपायुक्त किरणकुमार चव्हाण आणि चंद्रकांत खांडवी यांची भेट घेत गुन्हेगारांचा बीमोड करण्याची विनंती केली होती. त्या पार्श्वभूमीवर पोलिसांनी संशयितांची ‘वरात’ काढून चांगलाच वचक निर्माण केला. त्यानंतर सर्व आस्थापनांच्या बैठका घेत आस्थापनांनीही पोलिसांना सहकार्य करण्याच्या सूचना केल्या. त्यानुसार आस्थापनांनी आता सीसीटीव्ही कॅमेरे तैनात करून पोलिसांना सहकार्य करीत प्रत्येक हालचालीवर बारीक नजर ठेवण्यास सुरुवात केली आहे.

काय आहे संकल्पना?

प्रत्येक आस्थापनेमध्ये स्वत:च्या सुरक्षेसाठी सीसीटीव्ही तैनात करण्यात आले आहेत. मात्र, रस्त्यांवरील घटना दिसतील या स्वरूपाचे सीसीटीव्ही बसविण्यात आले नव्हते. त्यामुळे पोलिसांनी ‘एक कॅमेरा नाशिकसाठी’ अशी संकल्पना मांडली. त्यातून रस्त्यावरील घटना दिसतील, या स्वरूपाचे सीसीटीव्ही आता बऱ्यापैकी आस्थापनांनी तैनात केले आहेत. त्यातील फूटेजद्वारे ‘स्ट्रीट क्राइम’सह इतर गंभीर गुन्ह्यांतील संशयित शोधण्यासाठी पोलिसांना फायदा होत आहे. बाजारपेठांमध्ये व्यावसायिकांची यादी करून त्यांच्याशी संवाद वाढविण्यावरही पोलिसांनी भर दिला आहे.

शहरातील तेरा पोलिस ठाण्यांच्या हद्दीत आस्थापनांनी एक कॅमेरा शहरासाठी लावला आहे. त्या अन्वये प्रत्येक पोलिस ठाण्याच्या हद्दीत सुमारे दीडशे आस्थापनांनी कॅमेरे बसविल्याने १,९५० सीसीटीव्हींचा वापर शहरासाठी करण्यात येत आहे. -अंकुश शिंदे, पोलिस आयुक्त