म. टा. विशेष प्रतिनिधी, मुंबई : गोवंडी येथील रहिवासी गेल्या काही काळापासून सातत्याने तेथील हवेच्या प्रदूषणाबद्दल तक्रार करत आहेत. यासंदर्भात गेल्या वर्षी डिसेंबरमध्ये विधान परिषदेत अतारांकित प्रश्न विचारण्यात आला होता. गोवंडी येथील जैववैद्यकीय कचऱ्याच्या प्रकल्पामुळे नागरिकांचे आरोग्य धोक्यात आल्याची स्थानिकांची तक्रार होती. या प्रकल्पामुळे प्रदूषण होत आहे का, गोवंडी परिसरातील प्रदूषण मापक यंत्रणेच्या माध्यमातून उपलब्ध होणारी आकडेवारी या पार्श्वभूमीवर माहिती विचारण्यात आली होती. यासंदर्भातील माहिती देताना गोवंडीजवळील चेंबूर येथे आयआयटीएम या संस्थेतर्फे चालवण्यात येणाऱ्या प्रदूषण मापकावरून उपलब्ध झालेली आकडेवारी सादर करण्यात आली होती. स्थानिक कार्यकर्ते व गोवंडी सिटिझन्स फोरमचे फैयाज शेख यांनी माहिती अधिकारात मागवलेल्या या उत्तराच्या पार्श्वभूमीवर जानेवारी ते मार्च आणि ऑक्टोबर या चार महिन्यांमध्ये पीएम १०, पीएम २.५ ची पातळी निर्धारित मानकांपेक्षा अधिक असल्याचे समोर आले आहे. हा प्रकल्प सुरू असल्याने त्याचा सातत्यपूर्ण परिणाम होत असल्याचेही नागरिकांचे म्हणणे आहे.ओडिशातील अपघातस्थळी कुजकट वास, स्थानिक बेजार; तपासासाठी टीम पोहोचली, काय सापडलं?
शेख यांनी अतारांकित प्रश्नाचे उत्तर पारदर्शीपणे मिळावे अशी मागणी केली होती. माहिती अधिकारामध्ये त्यांना गुरुवारी या प्रश्नाचे उत्तर मिळाले असून या उत्तरामध्ये हवेत तरंगणाऱ्या धुळीकणांची (पीएम १०) पातळी जानेवारी, फेब्रुवारी, मार्च आणि ऑक्टोबर २०२२ या महिन्यांमध्ये निर्धारित मानकापेक्षा जास्त असल्याचे नमूद करण्यात आले होते. पीएम २.५ या धुलिकणांची पातळी जानेवारी ते मार्चदरम्यान अधिक होती.

जैववैद्यकीय कचऱ्याचा हा प्रकल्प जून २०२३ पर्यंत खालापूर येथे हालवणे अपेक्षित होते. तिथे प्रकल्पासाठी काही परवानग्या बाकी असल्याने याचे काम तिथे सुरू झालेले नाही असे शेख यांनी सांगितले. गोवंडीमध्ये या प्रकल्पामुळे होणाऱ्या प्रदूषणासाठी इतर मतदारसंघाचे आमदार पुढाकार घेत आहेत, मात्र गोवंडीच्या आमदारांनीही प्रत्यक्ष नागरिकांच्या आरोग्यासाठी सक्रीय व्हावे अशी मागणी स्थानिकांनी केली आहे.

अशी आहे समस्या

– कार्बन मोनॉक्साइडची पातळीही जानेवारी ते एप्रिल २०२२ या कालावधीत निर्धारित मानकांपेक्षा अधिक होती. ही प्रदूषके निर्धारित मानकांपेक्षा जास्त आहेत.

– लोकांनी सातत्याने या प्रदूषकांमुळे त्रास होत असल्याचे सांगूनही यावर उपाययोजना केली जात नाही असे स्थानिकांचे म्हणणे.

– या परिसरामध्ये जो कचरा जाळला जातो, त्यावरही कारवाई होणे अपेक्षित आहे.