त्याप्रमाणे तपास केला असता अत्यंत धक्कादायक गोष्टी समोर आल्या आहेत. मेघन परशुराम नाक्ती, साहिल गणेश बिराडी, रोहन दुर्वास पाटील आणि सनित सुरेश बिराडी हे ४ जण प्रणय नाक्ती याला घेऊन कुडकी धरणाजवळ दारू-पार्टी करण्यास गेले होते.
याप्रकरणी संशयित आरोपी मेघन नाक्ती, साहील बिराडी या दोघांवरती खुनाचा प्रयत्न केल्याचा गुन्हा दाखल करण्यात आला असून न्यायालयाने त्यांची रवानगी पोलीस कोठडीत केली आहे. प्रणय नाक्ती याच्या धरणातील बुडून झालेल्या मृत्यूप्रकरणी त्याच्या घरच्यांनी पोलिसांकडे संशय व्यक्त केला होता. यावरून या सगळ्या मित्रांची कसून चौकशी केल्यावर हा सगळा धक्कादायक प्रकार समोर आला.
त्यावेळी प्रणय नाक्ती हा दारूच्या नशेत आहे याची जाणीव असतानाही मेघन नाक्तीने त्याच्या खांद्यावर हात ठेऊन दाब देत उडी मारली. या कृतीमुळे प्रणयचा पाण्यात बुडून जीव जाईल याची जाणीव असतानाही मेघनने अक्षरशः प्रणयच्या जीवाशी खेळ केला. ही प्राणघातक कृती प्रणयच्या जीवावर बेतली. तो पाण्यात गटांगळ्या खाऊ लागला. अखेर पाण्यात बुडून, गुदमरून अत्यंत वेदनामय अंत प्रणयच्या नशिबी आला.
प्रणय पाण्यात बुडाल्याचे पाहून साहिल बिराडीने प्रणयचा मोबाईल पाण्यात फेकून दिला. ज्यामुळे तो कुठे आहे याचा शोध घेणे कठीण जाईल. त्यानंतर इतर दोन मित्र रोहन दुर्वास पाटील आणि सनित सुरेश बिराडी यांना या घटनेबदल कोणालाही काहीही सांगायचे नाही असे मेघन नाक्ती, साहिल बिराडी यांनी धमकावले. यानंतर हे चौघेही मित्र काही घडलेच नाही या अविर्भावात घरी परतले. मात्र दिघी सागरी पोलीसांनी अत्यंत कौशल्याने या घटनेचा तपास करून आरोपी मित्रांना ताब्यात घेतलं. पोलिसी खाक्या दाखवताच त्यांनी गुन्हा काबुल केला.
आपला मित्र प्रणयला अशा पद्धतीने क्रूर पद्धतीने का संपवलं याबाबत पोलीस चौकशी करीत आहेत. मात्र हा सगळा भयंकर प्रकार दारूच्या नशेतच करण्यात आल्याची माहिती पोलीस तपासात समोर आली आहे. या सगळ्या प्रकरणाचा अधिक तपास दिघी सागरी पोलीस ठाण्याचे सहाय्यक पोलीस निरीक्षक प्रसाद ढेबे करत आहेत.