पूर्व द्रुतगती महामार्गालगत असलेल्या मनोरुग्णालयाच्या जागेत नवे ठाणे स्थानक उभारण्यात येणार आहे. मनोरुग्णालयाची एकूण जागा ६ हेक्टर असून, यापैकी १.३ हेक्टर जागेत नव्या स्थानकाची उभारणी होणार आहे. नव्या ठाणे स्थानकामध्ये होम फलाटासह दुतर्फा तीन फलाट असतील. स्थानकात तीन पादचारी पूल उभारण्यात येणार असून, यापैकी दोन पुलांची जोडणी फलाटांना आणि एका पुलाची जोडणी पूर्व-पश्चिम असेल. स्थानकात २५० बाय ३० मीटर उन्नत डेक उभारण्यात येणार असून, हा डेक महामार्गाला जोडण्यात येणार आहे. त्यासोबतच सरकते जिने, लिफ्ट या आधुनिक सुविधा फलाटांवर असतील.

मध्य रेल्वेच्या मुख्य मार्गावरील मुलुंड स्थानकातून दररोज ८००हून अधिक लोकल फेऱ्या होतात. ठाण्यातून ट्रान्स हार्बर, मुख्य आणि मेल-एक्स्प्रेससह एकूण १ हजार ३००हून अधिक रेल्वे फेऱ्यांची हाताळणी होते. यामुळे नव्या ठाणे स्थानकात सध्याच्या ठाणे स्थानकातील धीम्या लोकल वळवून प्रवासी गर्दी विभागण्यात येणार आहे. जलद लोकल आणि मेल-एक्स्प्रेस सध्याच्या ठाणे स्थानकातूनच चालवण्याचे नियोजन आहे. नव्या ठाणे स्थानकासाठी अपेक्षित खर्च १८३ कोटी रुपये असून, ठाणे स्मार्ट शहरांतर्गत स्थानक आणि परिसरासाठी २८९ कोटींची तरतूद आहे. हा खर्च ठाणे महापालिकेकडून मध्य रेल्वेला देण्यात येणार आहे.

राज्य सरकारकडून मनोरुग्णालयाची जमीन आणि ठाणे महापालिकेकडून निधीचा पहिला टप्पा वितरीत झाल्यावर रेल्वेकडून निविदा प्रक्रिया सुरू करण्यात येणार आहे. निविदा प्रक्रिया पूर्ण झाल्यावर दोन वर्षांत स्थानकाचे काम पूर्ण करून प्रवासी वाहतुकीसाठी नवे स्थानक खुले होईल, अशी माहिती मध्य रेल्वेच्या वरिष्ठ अधिकाऱ्याने दिली.
धावत्या ट्रेनद्वारे होणार वीज निर्मिती, रेल्वेची भन्नाट आयडिया
उच्च न्यायालयाने मनोरुग्णालयातील जागेच्या हस्तांतरणावरील स्थगिती उठवली आहे. सार्वजनिक बांधकाम विभागाने मनोरुग्णालयाची जागा महसूल विभागाकडे सुपूर्द केली आहे. महसूल विभागाकडून ठाणे महापालिका आणि मध्य रेल्वेकडे जागा देण्याची प्रक्रिया लवकरच पूर्ण होईल. महापालिकेने प्रस्तावित नव्या रेल्वे स्थानक परिसरात भिंत उभारण्याचे काम सुरू केले आहे. स्थानक उभारणी मध्य रेल्वेकडून करण्यात येणार असून, स्थानक परिसरात महापालिकेकडून सुविधा देण्यात येणार आहे. – अभिजीत बांगर, आयुक्त, ठाणे महापालिका