संचालक (वाणिज्य) म्हणून डॉ. मुऱ्हारी केळे हे महावितरणमधील अधिकारीच कार्यरत होते. नोव्हेंबर महिन्यात डॉ. केळे यांना राजीनामा देण्यास सांगून नागपूरच्या योगेश गडकरी यांच्याकडे तात्पुरता कार्यभार सोपविण्यात आला. त्यावेळी डॉ. केळे यांना संचालकपदावरुन मुख्य अभियंता करण्यात आले. आता दोनच दिवसांपूर्वी संचालक (वाणिज्य) म्हणून योगेश गडकरी यांची नियुक्ती कायम करण्यात आली. महापारेषणमध्ये सध्या मुख्य अभियंता असलेले अनिल कोलप हे कंपनीचे संचालक (संचालन) होते. त्यांच्या कार्यकाळात पारषेण वाहिन्या सक्षमीकरणाचे काम सुरू झाले होते. मात्र काही दिवसांपूर्वी कोलप यांना राजीनामा देण्यास सांगण्यात आले व त्याजागी संदीप कलंत्री यांची नियुक्ती करण्यात आली. मात्र कलंत्री अद्यापही यापदी प्रभारी म्हणून आहेत. त्यांची कायमस्वरूपी नियुक्ती झालेली नाही, हे विशेष. दोनच दिवसांपूर्वी महापारेषणचे अध्यक्ष व व्यवस्थापकीय संचालक दिनेश वाघमारे हे गृह विभागात प्रधान सचिव म्हणून रुजू झाले व त्याजागी संजीवकुमार यांनी महापारेषणचा पदभार स्वीकारला आहे.