त्यादिवशी नेमकं काय घडलेलं?

२२ एप्रिल २००६ च्या दिवशी प्रमोद महाजन यांच्या वरळीतील राहत्या घरी त्यांचे भाऊ प्रवीण महाजन सकाळी ७.३० च्या सुमारास आले. आदल्या रात्रीच प्रमोद महाजन आणि प्रवीण महाजन यांच्यात वाद झाला होता. प्रवीण यांनी येताच तक्रारी करणं सुरु केलं. प्रवीण यांना वाटायचं की प्रमोद यांच्या ओळखीनं त्यांच्या आजूबाजूच्या लोकांनी कामधंद्यात फायदा करून चांगले पैसे कमावले होते, मात्र प्रवीण यांना प्रमोद हे बाजूला ठेवतात.

शिवाय प्रमोद त्यांना भेटीसाठी वेळ देत नाही आणि त्यांना टाळण्याचा प्रयत्न करतात असा प्रवीण यांचा समज होता. साधारण १० मिनिटं हे बोलणं झाल्यानंतर प्रमोद महाजन यांनी जर काही महत्वाचं बोलायचं असेल तर असिस्टंटकडून अपॉइटमेंट घेऊन भेटायला यायला सांगितलं. ही गोष्ट प्रवीण यांना लागली आणि त्यांनी खिशातील पिस्तूल काढली आणि प्रमोद महाजन यांच्यावर गोळ्या झाडल्या. प्रमोद महाजन यांच्या पत्नी गोळ्यांचा आवाज ऐकून तिथे पोहोचल्या, यानंतर प्रवीण महाजन तिथून निघून गेले. रेखा महाजन यांनी तातडीनं त्याच इमारतीत राहणाऱ्या गोपीनाथ मुंडे यांना बोलावलं आणि प्रमोद यांना रुग्णालयात दाखल केलं.
उमद्या नेतृत्वाचा अकाली अंत; मध्यमवर्गीयांच्या जगाला धक्का, राष्ट्रीय राजकारणही हादरलं

रुग्णालयात डॉक्टरांचे शर्थीचे प्रयत्न

रुग्णालयात प्रमोद महाजन यांना वाचवण्याचे शर्थीचे प्रयत्न सुरु होते तेव्हा दुसरीकडे प्रवीण महाजन ट्रॅफिक पोलीस हेडक्वाटर्समध्ये पोहोचले आणि घडलेली हकिकत सांगितली. त्यानंतर पोलिसांनी त्यांना वरळी पोलिस स्टेशनला जाण्यास सांगितलं. प्रवीण यांनी वरळी पोलीस स्टेशनला जाऊन ” मी प्रमोद महाजन यांना गोळ्या मारल्या, सरेंडर करण्यास आलो आहे” असं सांगितलं.

Sharad Pawar : मुख्यमंत्री असताना फक्त दोनदा मंत्रालयात जाणे पचनी पडले नाही, पवारांची उद्धव ठाकरेंवर टीका
यानंतर प्रवीण महाजन यांच्यावर गुन्हा दाखल करून त्यांना अटक करण्यात आली. दुसरीकडे प्रमोद महाजन यांना वाचवण्यासाठी डॉक्टर शर्थीचे प्रयत्न करत होते. मात्र अखेर १३ दिवसांनी सगळे प्रयत्न निष्फळ ठरले आणि ३ मे २००६ ला प्रमोद महाजन यांची प्राणज्योत मालवली. प्रवीण महाजन यांच्यावर हत्येचा प्रयत्नाचा असलेला गुन्हा आता बदलून हत्येचा गुन्हा झाला होता. मात्र प्रवीण महाजन यांच्या चेहऱ्यावर तसूभरही दुःख नव्हतं. हे प्रकरण न्यायालयात पोहोचलं तेव्हा सगळ्यांना एकच प्रश्न होता की या हत्येमागे नेमकं कारण काय होतं? ही हत्या रागात केली की आधीच प्लॅन करून करण्यात आली याबाबतही चौकशी करण्यात आली.

२००७ मध्ये प्रवीण महाजनांना जन्मठेप

प्रमोद महाजन यांच्या पत्नी रेखा यांनी सांगितलं की, प्रवीण हे प्रमोद यांच्याकडे पैशांची मागणी करत होते. प्रमोद यांनी नकार दिल्यानंतर प्रवीण यांनी गोळी चालवली. प्रवीण यांनी देखील प्रमोद यांनी अपॉइंमेंटचं वक्तव्य केल्यानं गोळी झाडल्याचं सांगितलं. मात्र प्रवीण यांनी सारखा सारखा आपला जबाब बदलला. शेवटी २००७ मध्ये प्रवीण यांना जन्मठेपेची शिक्षा सुनावण्यात आली.

हत्येमागचं गूढ कायम

२०१० मध्ये ब्रेन हॅमरेजने प्रवीण यांचा मृत्यू झाला, पण प्रमोद महाजन यांच्या हत्येमागचं खरं कारण काय असा प्रश्न कायमच राहिला. प्रवीण महाजन यांनी वारंवार केलेल्या वक्तव्यानुसार कधी राग तर कधी पैसा हेच कारण होतं. मात्र, प्रवीणच्या मृत्यूने हे प्रकरण बंद करण्यात आलं. मात्र प्रवीण यांनी प्रमोद यांची हत्या का केली हे स्पष्ट झालंच नाही. कदाचित कारण एक क्षणिक रागातून ते झालं असावं आणि न्यायालयानेही तशीच भूमिका घेतली. मात्र प्रकरण हे हायप्रोफाईल असल्याने आणि एवढ्या मोठ्या माणसाचा असाच रागात खून झाला असं सांगितलेलं कुणालाच फारसं पटलं नव्हतं.

आणि आता प्रमोद महाजन यांच्या कन्या पूनम यांनी या हत्येमागचा मास्टरमांइड कोण आहे हे माहित असल्याचं म्हटलं. त्यामुळे पुन्हा एकदा प्रमोद महाजन यांच्या हत्येमागचं राजकारण चर्चिल जातंय.