यावेळी बाल शिवाजी, जिजाऊ, मावळे यांच्या उपस्थितीत झालेल्या सोहळ्याला एक वेगळे ऐतिहासिक स्वरूप लाभले. तर सर्वत्र ‘छत्रपती शिवाजी महाराज की जय’, ‘हर हर महादेव’ घोषणेने आणि शिवभक्तांकडून पन्हाळगड दुमदुमून सोडण्यात आला. सजवलेले तोफगाडे भगवे झेंडे अशा उत्साही वातावरणात तोफांना तोफगाड्यांवर विराजमान करत छत्रपती शिवाजी महाराजांनी संभाजी महाराजांच्या इतिहासाची साक्ष देणाऱ्या या तोफांचा सन्मान राखण्यात आला. यावेळी तोफ कारागीर राजाराम सुतार आणि बाळकृष्ण सुतार यांच्यासह हानीफ नगारजी यांचा ही सत्कार करण्यात आला.

यावेळी प्रांताधिकारी समीर शिंगटे, तहसीलदार रमेश शेंडगे, नगरपालिका मुख्याधिकारी चेतनकुमार माळी, निवासी नायब तहसीलदार विनय कौलवकर, माजी नगराध्यक्ष रूपालीताई धडेल, रवींद्र धडेल, माजी नगराध्यक्ष विजय पाटील, शिवराष्ट्र परिवाराचे अध्यक्ष प्रशांत साळुंखे, जिल्हाध्यक्ष मोहन खोत, मोहीम प्रमुख गणेश कदम, श्रेयश भंडारी, अतुल कापटे, स्वीकृत माजी नगरसेवक अँड रवींद्र तोरसे, दिनकर भोपळे यांच्या उपस्थितीत लोकार्पण सोहळा झाला.

‘पन्हाळगडाला खूप मोठे ऐतिहासिक महत्त्व आहे. त्याचे संवर्धन होणे काळाची गरज आहे. शिवराष्ट्र परिवाराने तोफांचे केलेले संवर्धन खरोखरच स्तुत्य आहे. पन्हाळगड संवर्धनासाठी जे काही करावे लागेल ते शासन पातळीवर आपण करू’, असं प्रांताधिकारी समीर शिंगटे म्हणाले.

‘तोफांसह तोफगाड्यांचं संवर्धन होण्यासाठी छत्रपती शिवाजी महाराज मंदिर येथे कायमस्वरूपी छत उभारले जाईल. शिवप्रेमींना हा पाच तोफांचा ऐतिहासिक ठेवा कायमस्वरूपी पहावयास मिळेल. शिवराष्ट्राचा गड संवर्धनाचा उपक्रम कौतुकास्पद आहे’, असं मुख्याधिकारी चेतनकुमार माळी म्हणाले.