संजय राऊत शुक्रवारी मुंबईतील पत्रकार परिषदेत बोलत होते. यावेळी त्यांनी म्हटले की, भाजपने एवढे पोपट पाळून ठेवले आहेत. त्यांना बोलू द्या, पोपटपंची करु द्या. नोटबंदी झाली तेव्हा पैसे काढण्याच्या रांगेत हजारो लोक मेले. हा सदोष मनुष्यवधच आहे. त्यावरही या पोपटांना बोलायला सांगा. करोना काळात गंगेत प्रेतं तरंगत होती. गुजरातमध्ये मृतदेह जाळण्यासाठी स्मशानात जागा नव्हती. मग गुजरातचे मुख्यमंत्री आणि उत्तर प्रदेशचे मुख्यमंत्री योगी आदित्यनाथ यांच्यावरही सदोष मनुष्यवधाचा गुन्हा दाखल करण्याची मागणी राज ठाकरे यांनी केली पाहिजे. ते जगाचे नेते आहेत. ते काय मागण्या करत आहेत, कोणासाठी करत आहेत? खारघर दुर्घटनेतील ढिसाळ नियोजन, लोक पाण्यासाठी तडफडत असताना मैदानात सुरु असलेल्या शाही मेजवानिविषयी राज ठाकरे यांनी बोलावे. उठसूट उद्धव ठाकरे यांच्यावर काय टीका करता? झोपेत, जागेपणी त्यांना उद्धव ठाकरे हेच दिसतात, अशी टीका संजय राऊत यांनी केली.
खारघरच्या मैदानावर लाखो श्रीसेवक पाण्यावाचून तडफडत होते अन् शामियान्यात शाही मेजवानी सुरु होती: संजय राऊत

राज ठाकरे नेमकं काय म्हणाले होते?

करोनाच्या काळातही अनेक प्रकारचा हलगर्जीपणा झाला आहे. तिथेही अनेक प्रकरणांमध्ये आपल्याला सदोष मनुष्यवधाचा खटला आजही दाखल करता येऊ शकतो. याचं राजकारण करायला नको. महाराष्ट्र भूषण पुरस्कार सोहळ्यासाठी सकाळची वेळ निवडायला नको होती. आप्पासाहेब धर्माधिकारी यांना राजभवनात पुरस्कार देता आला असता. अप्पासाहेब धर्माधिकारी यांचा पुरस्कार मिळाला आहे ही आनंदाची बाब आहे. मात्र जे घडलं तो अपघात आहे. अपघाताचं राजकारण कुणीही करू नये, असे राज ठाकरे यांनी म्हटले होते.