जळगाव :जळगाव शहरातील सुप्रिम कॉलनीजवळ एका कंपनीत कामाला असलेल्या मजुराचा विजेच्या धक्क्याने जागीच मृत्यू झाला. ही घटना बुधवारी दुपारी तीन वाजताच्या सुमारास घडली आहे. प्रकाश मजन बारेला (वय २२ वर्ष, रा. किनगाव ता. यावल ह.मु. सुप्रिम कॉलनी, जळगाव) असे मृत तरूणाचे नाव आहे.प्रकाश बारेला हा पत्नी व लहान भाऊ यांच्यासोबत गेल्या महिन्याभरापासून सुप्रिम कॉलनीत वास्तव्याला होता. कॉलनी जवळ असलेल्या प्लॅस्टिक रिसायकलिंग करण्याच्या कंपनीत तो काम करत होता. त्याच कंपनीत त्याचा लहान भाऊ अनिल हा देखील कामाला आहे.

नेहमीप्रमाणे बुधवारी प्रकाश बारेला कंपनीत कामावर गेला. काम करत असताना दुपारी ३ वाजता रिसायकलींग करणारे मशीन चालू करण्यासाठी गेला असता त्याला विजेचा जोरदार धक्का बसला. यात प्रकाशचा जागीच मृत्यू झाला. त्याला इतर सहकाऱ्यांनी तातडीने उचलून जिल्हा शासकीय वैद्यकीय महाविद्यालयात दाखल केले. मात्र वैद्यकीय अधिकाऱ्यांनी त्याला मृत घोषित केले.

बारेला कुटुंबावर दु:खाचा डोंगर कोसळला

तीन महिन्यांपूर्वीच प्रकाश बारेला याचे लग्न झाले होते. कामाच्या निमित्ताने गेल्या महिन्याभरापासून पत्नी व लहान भावासोबत सुप्रिम कॉलनीत राहायला आला होता. या घटनेमुळे बारेला कुटुंबावर दु:खाचा डोंगर कोसळला आहे.

आई-अण्णा माफ करा, मी कुठल्या मुलीसाठी नाही, तर… २३ वर्षीय तरुणाचं टोकाचं पाऊल

त्याच्या पश्चात वडील, पत्नी काजल, दोन भाऊ अनिल आणि बाळू असा परिवार आहे. या घटनेबाबत एमआयडीसी पोलीस ठाण्यात अकस्मात मृत्यूची नोंद करण्यात आली आहे. पुढील तपास पोलीस नाईक किरण पाटील करीत आहे.

मेणबत्ती कारखान्यातील आगीत मायलेकीचा बळी, तीन चिमुकल्या पोरक्या, गावात हळहळ