म. टा. खास प्रतिनिधी, मुंबई : मुंबईच्या वीजमागणीने सोमवारी (ता. १०) ३५०० मेगावॉटचा टप्पा पार केला. मुंबईची आजवरची कमाल वीजमागणी एप्रिल २०२२मध्ये ३,८०० मेगावॉटची असली, तरी या मोसमात पहिल्यांदाच ३,५०० मेगावॉटचा टप्पा पार झाला आहे. मागील आठवड्यातील वीजमागणी सरासरी ३२०० मेगावॉटदरम्यान असताना, सोमवारी एकाएकी ३०० मेगावॉटची वाढ दिसली.मुंबईची वीजमागणी सहसा सरासरी २४०० ते २६०० मेगावॉटदरम्यान असते. करोना संकटानंतर ही सरासरी २८०० ते तीन हजार मेगावॉटच्या घरात गेली. तर मागील उन्हाळ्यात सरासरी ३२०० ते ३३०० मेगावॉटदरम्यान होती. यंदा मात्र मार्चमध्ये ऊन तापू लागल्यापासून सातत्याने मुंबईची वीजमागणी तीन हजार मेगावॉटच्या वरच आहे. सोमवारी दुपारी २.४० वाजता मागणीने ३,५३२ मेगावॉटचा उच्चांक गाठला. मुंबई शहर व उपनगरात अदानी इलेक्ट्रिसिटी मुंबई लिमिटेडचे (एईएमएल) ३० लाख, टाटा पॉवरचे साडेसात लाख आणि बेस्ट उपक्रमच्या साडेदहा लाख ग्राहकांना वीजवितरण केले जाते. उच्चांकावेळी एईएमएल १६३३, टाटा पॉवर ९३० आणि बेस्ट उपक्रमची मागणी ८२६ मेगावॉट इतकी होती.

मुंबईत वीज आणण्यासाठी राज्य सरकारी महापारेषण कंपनीच्या प्रत्येकी ४०० किलोव्हॅट क्षमतेच्या चार वाहिन्या आहेत. या चारही वाहिन्या जुन्या असल्याने त्यांची एकात्मिक क्षमता जेमतेम २४०० मेगावॉटच आहे. टाटा पॉवरच्या प्रत्येकी २२० किलोव्हॅट क्षमतेच्या तीन वाहिन्या आहेत. कंपनीने वाहिन्यांवर अतिरिक्त कंडक्टर बसवून त्यांची क्षमता प्रत्येकी ६०० मेगावॉट केली आहे. हे सर्व बघता मुंबईत सध्या कमाल चार हजार ते ४२०० मेगावॉट वीजच बाहेरून येऊ शकते. या स्थितीत सातत्याने वीज वाढती असणे हे तसे आव्हानात्मक असेल.

केसात गजरा, हातात पद्मश्री पुरस्कार, रवीना टंडन मुंबईत परतली

पारेषण विभाग सज्ज

आगामी काळात वाढती वीजमागणी बघता पारेषण विभागाने सर्व विभाग व झोनमध्ये वॉर रूम उभी केली आहे. तसेच मुंबईच्या अखंडित विजेसाठी आयलँडिंगवर बारकाईने लक्ष दिले जात आहे. मुंबईतील सर्व वीज वितरण कंपन्यांशी संपर्क साधला जात असल्याचे महापारेषणचे (म.रा.विद्युत पारेषण कंपनी लि.) अध्यक्ष व व्यवस्थापकीय संचालक दिनेश वाघमारे यांनी याआधीच ‘महाराष्ट्र टाइम्स’शी बोलताना स्पष्ट केले आहे.