मुंबई : ठाकरे गटाच्या कार्यकर्त्या रोशनी शिंदे यांना झालेल्या मारहाणीनंतर उद्धव ठाकरे, रश्मी ठाकरे आणि आदित्य ठाकरे यांनी ठाण्यात जाऊन त्यांची भेट घेतली. घडलेल्या प्रसंगाची माहिती घेऊन तुम्ही घाबरु नका. सगळे शिवसैनिक तुमच्या पाठीशी आहेत, असा धीर देतानाच त्यांच्या तब्येतीची आपुलकीने विचारपूस केली. रोशनी शिंदे यांना मारहाण होऊनही त्यांची पोलिसांनी तक्रार न घेतल्याने उद्धव ठाकरे यांनी तडक पोलीस आयुक्तालय गाठलं. परंतु पोलीस आयुक्त कार्यालयात आयुक्त उपस्थित नसल्याने ठाकरे भडकले. बिनकामाच्या आयुक्ताचं निलंबन करा किंवा बदली करा, अशी मागणी उद्धव ठाकरे यांनी केली. दुसरीकडे आदित्य ठाकरे यांच्या नेतृत्वाखाली ठाणे पोलीस आयुक्तलयावर उद्या मोर्चा काढण्यात येणार असल्याचं खासदार विनायक राऊत यांनी सांगितलं. रोशनी शिंदे यांनी मुख्यमंत्री एकनाथ शिंदे यांच्याविरोधात फेसबुक पोस्ट केल्याने शिंदेंच्या महिला कार्यकर्त्यांनी रोशनी शिंदे यांना मारहाण केल्याचा आरोप आहे. रोशनी शिंदे यांच्यावर सध्या ठाण्यातील खासगी रुग्णालयात उपचार सुरु आहेत. दुपारी २ वाजताच्या सुमारास उद्धव ठाकरे, रश्मी ठाकरे आणि आदित्य ठाकरे यांनी रुग्णालयात जाऊन रोशनी यांची भेट घेतली. आपुलकीने विचारपूस करुन त्यांना धीर देण्याचा प्रयत्न केला.
रोशनी यांची भेट घेतल्यानंतर उद्धव ठाकरे यांनी पत्रकार परिषद घेऊन राज्य सरकारवर टीका केली. झेपत नसेल तर गृहमंत्र्यांनी राजीनामा द्यावा, अशी मागणी करतानाच इथल्या बिनकामी पोलीस आयुक्तांचं निलंबन करावं किंवा त्यांची बदली करावी. मी त्यांना त्यांच्या कार्यालयात भेटण्यासाठी गेलो तर ते जागेवर नव्हते. ठाण्याचं आयुक्तपद जर त्यांना झेपत नसेल तर त्यांच्याकडून ते काढून घ्यावं किंवा त्यांची बदली करावी, असं उद्धव ठाकरे म्हणाले.आदित्य ठाकरे यांच्या नेतृत्वात उद्या आयुक्तालयावर मोर्चा
ठाणे शहरात सध्या कायदा सुव्यवस्था प्रचंड बिघडलेली आहे. पोलीस यंत्रणेचा अजिबातच वचक राहिलेला नाहीये. त्यामुळे ठाकरे गटाच्या वतीने बिनकामाच्या पोलीस आयुक्तांविरोधात उद्या आदित्य ठाकरे यांच्या नेतृत्वाखाली प्रचंड मोठा मोर्चा काढण्यात येईल, अशी माहिती खासदार विनायक राऊत यांनी दिलीये.
