भारतीय भूमीत जन्माला आलेले हे चार बछडे म्हणजे ‘भारतीय चित्त्यांची’ पहिली पिढी असल्याची भावना व्यक्त होत आहे. १९४७मध्ये भारतातील अखेरच्या चित्त्याची सध्याच्या छत्तीसगढ राज्यातील कोरीया येथे शिकार झाली होती. १९५२मध्ये चित्ता भारतातून नामशेष झाल्याचे जाहीर करण्यात आले होते. आफ्रिका खंडातील देशांमधून चित्त्यांचे भारतात स्थलांतर हा भारतात पुन्हा चित्ते वसविण्याच्या महत्त्वाकांक्षी कार्यक्रमाचा भाग आहे. नामिबियाहून आणलेल्या चित्त्यांना १७ सप्टेंबर रोजी पंतप्रधान नरेंद्र मोदी यांच्या हस्ते कुनो राष्ट्रीय उद्यानात सोडण्यात आले होते.

नामिबियाहून आणलेल्या साशा या मादी चित्त्याचा २७ मार्च रोजी मूत्रपिंडाच्या आजाराने मृत्यू झाला होता. फेब्रुवारीमध्ये दक्षिण आफ्रिकेतून आणलेल्या १२ चित्त्यांना सध्या कुनोमधील विलगीकरणात ठेवण्यात आले असून ते सुदृढ आणि सक्रिय असल्याचे वनाधिकाऱ्यांनी सांगितले.