चिनाब नदीवरील पुलाच्या निर्मितीचे मोठे अवघड काम रेल्वे अभियंत्यांनी पूर्ण केले आहे. यामुळे प्रवासी वाहतुकीसह मालवाहतुकीला विशेषत: काश्मिरी सफरचंद रेल्वेमार्गे देशाच्या कानाकोपऱ्यात कमी खर्चात आणि कमी वेळेत पोहोचवणे शक्य होणार आहे. बांधकाम साहित्य, जीवनावश्यक वस्तू काश्मीर खोऱ्यात आणण्यासाठी वाहतूक खर्च मोठ्या प्रमाणात होतो. यामुळे वस्तूंच्या किंमतीमध्ये वाढ होते. यासाठी बनिहाल ते बारामुल्ला दरम्यान प्रधानमंत्री गतिशक्ती योजनेंतर्गत चार कार्गो टर्मिनल उभारण्यात येणार आहेत. यापैकी दोन टर्मिनलसाठी जागा निश्चित करण्यात आली असून उर्वरित दोन टर्मिनलसाठी जागा लवकरच निश्चित करण्यात येईल, असे त्यांनी सांगितले.

चिनाब पुलाची वैशिष्ट्ये

– वेल्डिंगच्या आधारे पुलाची जोडणी करण्यात आली आहे. या सर्व वेल्डिंग एकमेकांना जोडल्यास त्याची लांबी सुमारे ६०० किमी होईल.

– पॅरिसमधील आयफेल टॉवरपेक्षा ३५ मीटर उंच.

– चिनाब नदीपातळीपासून ३५९ मीटर उंचावर. पुलाची लांबी १,३१५ मीटर.

– २८,६६० मेट्रिक टन स्टीलचा वापर.

– पुलाच्या मजबुतीकरणासाठी अर्धे फुटबॉल मैदान मावू शकेल अशा जागेत पायाभरणी.

– खोऱ्यातील अतिवेगवान वाऱ्याचा विचार करून विशेष तंत्रज्ञानाचा वापर. त्यामुळे कमाल २६६ किमी प्रतितास वेगवान वाऱ्याला तोंड देण्यास पूल सक्षम.

– आयआयटी रुरकीच्या मदतीने भूकंपप्रतिरोधक तंत्रज्ञानाचा वापर. ८ रिश्टर स्केलपर्यंत क्षमतेच्या भूकंपाचा धक्का सहन करण्याची क्षमता.

– एकूण खर्च : १,४८६ कोटी

– कमाल १०० किमी प्रतितास वेगाने रेल्वेगाड्या या पुलावरून धावू शकणार.

– पुलाचे सरासरी किमान आयुर्मान १२० वर्षे.