पुणेकर व्यावसायिक १४ सप्टेंबरला त्याच्या मैत्रिणीसोबत विमानतळावर पोहोचला. मैत्रिणीचा पासपोर्ट जुना होता आणि तो हरवल्याची तक्रार तिनं नोंदवलेली होती. तोच पासपोर्ट तिनं इमिग्रेशन विभागाच्या कर्मचाऱ्यांना दाखवला. त्यामुळे कर्मचाऱ्यांनी तिला रोखलं. या पासपोर्ट सोबत प्रवास करता येणार नाही, असं अधिकाऱ्यांनी स्पष्ट सांगितलं. पुढील कार्यवाहीच्या भितीनं त्याची बोबडी वळली. पत्नी समोर बिंग फुटू नये यासाठी त्यानं इमिग्रेशनमधील अडचणींची खोटी कहाणी रचली. ही कहाणी सहार पोलीस ठाण्याच्या अधिकाऱ्यांनी समोर आणली.

४६ वर्षांच्या व्यक्तीच्या पुण्यात लॉण्ड्रीचा मोठा व्यवसाय आहे. विमानतळावर चेकिंग सुरू असताना मैत्रीण पासपोर्टमुळे अडकताच व्यावसायिकानं पुढचा प्रवासच रद्द केला. त्यानं भितीनं मोबाईल स्विच्ड ऑफ केला. त्यानंतर तो त्याच्या प्रेयसीसोबत छत्रपती शिवाजी महाराज टर्मिनसला गेला. तिथे असलेल्या लँडलाईनवरून त्यानं पत्नीला कॉल केला. इमिग्रेशनच्या समस्येमुळे मला माझा मोबाईल जमा करावा लागत असल्याचं त्यानं पत्नीला सांगितलं.

दुसऱ्या दिवशीही त्यानं पत्नीशी अतिशय त्रोटक संवाद साधला. त्यावेळीही त्यानं इमिग्रेशनची खोटी कहाणी ऐकवली. त्यानंतर त्याचा मोबाईल पूर्णपणे बंद झाला. बराच वेळ पतीशी संपर्क न झाल्यानं पत्नी घाबरली. तिनं पोलीस ठाण्यात जाऊन अपहरणाची तक्रार नोंदवली. पोलिसांनी तपास सुरू करताच प्रकरण उघडकीस आलं. बायकोसमोर सत्य येऊ नये यासाठी व्यावसायिकानं सगळी कहाणी रचल्याचं पोलीस अधिकाऱ्यानं सांगितलं.

पत्नीनं अपहरणाची तक्रार दिल्यानंतर दुसऱ्याच दिवशी व्यावसायिक सहार पोलीस ठाण्यात पोहोचला. याच पोलीस ठाण्याच्या हद्दीत आंतरराष्ट्रीय विमानतळ येतं. पत्नीला सत्य समजू नये यासाठी इमिग्रेशनची कहाणी रचल्याची कबुली त्यानं पोलिसांकडे दिली. त्यानंतर या सगळ्या नाट्यमय प्रकरणावर पडदा पडला.