पालघर जिल्ह्यातील जात पडताळणी समितीने 20 ऑगस्टला विशाखा राऊत यांचं जात प्रमाणपत्रे अवैध ठरवलं होतं. त्यानंतर उपमुख्यमंत्री एकनाथ शिंदे यांच्या शिवसेनेकडून विशाखा राऊत यांचं नगरसेवकपद रद्द करण्याची वारंवार मागणी सुरु होती. या मागणीनंतर मुंबई महापालिका आयुक्त अश्विनी भिडे यांनी नगरविकास विभागाला पत्र लिहून कळवलं आहे की, विशाखा राऊत यांचं जात प्रमाणपत्र रद्द करण्यात आलं आहे. त्यामुळे त्यांचं नगरसेवकपद आपोआप रद्द झालं आहे.

महापालिका आयुक्त पत्रात काय म्हणाल्या?

अश्विनी भिडे यांनी नगरविकास विभागाचे अप्पर मुख्य सचिवांना पत्राद्वारे याबाबत कळवले आहे. नगरसेविका प्रभाग क्रमांक 191 यांचे नगरसेवक पद आपोआप रद्द झाल्याने पुढील सहा वर्षे नगरसेवक पदाच्या निवडणूक लढवण्यास विशाखा राऊत अपात्र आहेत, असा उल्लेख आपण जे गॅझेट काढाला त्यामध्ये करावा, असं अश्विनी भिडे यांनी पत्रात म्हटलं आहे. लवकरच महापालिकेची सर्वसाधारण सभा राहील त्यावेळी याबाबत घोषणा करण्यात येणार असल्याची माहिती आहे.

Shiv Sena Hearing : शिवसेनेची सुनावणी रंगतदार मोडवर, पक्षात बंड का झालं? शिंदेंच्या वकिलांनी सांगितलं कारण, वाचा A टू Z युक्तिवाद

प्रिया सरवणकर यांना नगरसेवकपद मिळणार?

विशाखा राऊत यांच्या विरोधात माजी आमदार सदा सरवणकर यांच्या कन्या प्रिया सरवणकर यांनी निवडणूक लढवली होती. दोघांमध्ये प्रचंड अटीतटीची लढत झाली होती. या अटीतटीच्या लढतीत विशाखा राऊत यांचा विजय झाला होता. तर प्रिया सरवणकर या दोन नंबरच्या ठरल्या होत्या. आता विशाखा राऊत यांचं नगरसेवक पद रद्द झालं तर प्रिया सरवणकर यांना नगरेसवकपदाची संधी मिळू शकते.

सत्याचा विजय झाला, प्रिया सरवणकर यांची प्रतिक्रिया

“विशाखा राऊत यांनी संविधानाचा अपमान केला होता. त्यांनी खोट्या पद्धतीने ओबीसी सर्टिफिकेट काढून एका ओबीसी महिलेचा अधिकार घेण्याचा प्रयत्न केला होता. त्यांनी ओबीसी जागेवर निवडणूक लढवली होती. जात पडताळणी समितीने खूप चांगला निर्णय दिला होता. त्या विरोधात त्या हायकोर्टात आल्या होत्या. हायकोर्टाने त्यांची याचिका फेटाळली. मला आनंद होतोय की, सत्याचा आज विजय झाला आहे. ते एवढे वर्ष नगरसेविका होत्या. पण त्यांनी डिसेंबर 2025 मध्ये जात प्रमाणपत्र काढलं आहे. त्यांच्या घरात कुणाकडेही जात प्रमाणपत्र नव्हतं. त्यांनी निवडणुकीच्या काळात हे प्रमाणपत्र काढलं होतं”, अशी प्रतिक्रिया प्रिया सरवणकर यांनी दिली.