शिल्पाचा भाऊ संतोष कलाटे यांनी आपल्या बहिणीच्या मृत्यूबाबत अनेक गंभीर प्रश्न उपस्थित केले आहेत. रक्षाबंधनसाठी खरेदी करण्यासाठी शिल्पा माहेरी आली होती. त्यावेळी ती व्यवस्थित बोलून गेली; मात्र काही वेळातच परिस्थिती बदलली. “हॉस्पिटलमध्ये या,” असा निरोप मिळाल्यानंतर कुटुंबीय रुग्णालयात पोहोचले असताना डॉक्टरांनी शिल्पाला मृत घोषित केले होते, असे संतोष कलाटे यांनी सांगितले.

शिल्पाच्या भावाचे गंभीर आरोप

शिल्पाच्या पतीसह सासरच्या मंडळींकडून तिला सातत्याने त्रास दिला जात असल्याचा आरोप तिच्या भावाने केला आहे. पैशांवरून तसेच संपत्तीतील हिस्स्यावरून वाद होत असल्याचेही त्यांनी सांगितले. मद्यपान करून मारहाण केली जात असल्याचा आरोपही कुटुंबीयांनी केला आहे.

जमिनी दिल्यानंतरही मुलीचा छळ केल्याचा आरोप

शिल्पाचे आई-वडील रतन कलाटे आणि गुलाब कलाटे यांनीही मुलीच्या संसारातील 17 वर्षांच्या छळाचा पाढा वाचला. मामुर्डी आणि म्हाळुंगे येथील जमीन दिल्यानंतरही सासरच्या मंडळींकडून अधिक संपत्ती आणि पैशांसाठी दबाव आणला जात असल्याचा त्यांचा आरोप आहे. रक्षाबंधनसाठी माहेरी येतानाही तिला अडवले जात असल्याचे त्यांनी सांगितले. काही वेळा संध्याकाळी उशिरा तिला माहेरी पाठवले जात असल्याचा आरोपही त्यांनी केला.

शिल्पाच्या आई-वडिलांचा गंभीर आरोप

“मारहाण करायचे, इस्त्रीचे चटके दिले,” असा धक्कादायक आरोप शिल्पाच्या आई-वडिलांनी केला आहे. मुलीच्या छळाबाबत सासू-सासऱ्यांनी हस्तक्षेप करण्याऐवजी त्याला प्रोत्साहन दिल्याचा आरोपही त्यांनी केला.

मृत्यूपूर्वी शिल्पाचं आई-वडिलांशी बोलणं

शिल्पाच्या मृत्यूपूर्वी रात्री साडेअकरा ते बाराच्या सुमारास तिच्याशी फोनवर बोलणे झाले होते, असे कुटुंबीय सांगतात. जेवण केले का, गोळ्या घेतल्या का, अशी विचारपूस झाली होती. त्याचवेळी सासरी भांडण आणि शिवीगाळ सुरू असल्याचेही कुटुंबीयांनी सांगितले. शिल्पाचा पती मद्यपान केलेल्या अवस्थेत असल्याचा आरोप त्यांनी केला आहे.

शिल्पाच्या भावाला घातपाताचा संशय

या प्रकरणात आणखी एक गंभीर मुद्दा कुटुंबीयांनी उपस्थित केला आहे. आत्महत्या करणारी व्यक्ती साधारणपणे दरवाजा बंद करते; मात्र शिल्पाच्या मृत्यूच्या वेळी दरवाजा उघडा होता, असा दावा तिच्या भावाने केला. त्यामुळे हा आत्महत्येचा प्रकार नसून घातपात असण्याचा संशय असल्याचे त्यांनी स्पष्ट केले.

शिल्पाच्या पतीची गुन्हेगारी पार्श्वभूमी

शिल्पाच्या भावाने तिच्या सासरच्या मंडळींशी संबंधित जुन्या गुन्हेगारी पार्श्वभूमीचाही उल्लेख केला आहे. सचिन आणि संदीप गवारे यांच्यावर पूर्वी हत्येचा गुन्हा असल्याचा दावा त्यांनी केला. त्या प्रकरणात जन्मठेपेची शिक्षा झाली होती, असे कुटुंबीयांचे म्हणणे आहे.

संतोष कलाटे काय म्हणाले?

“आम्हाला खोटी माहिती देऊन आमची बहीण त्या घरात दिली. १७ वर्षे तिचा छळ सहन करावा लागला. आता माझ्या बहिणीला गमावलं,” अशी संतप्त भावना संतोष कलाटे यांनी व्यक्त केली.

शिल्पाच्या आई-वडिलांची कठोर कारवाई करण्याची मागणी

दरम्यान, शिल्पाच्या आई-वडिलांनी दोषींवर कठोर कारवाईची मागणी केली आहे. “माझ्या मुलाला राखी बांधायला आता माझी मुलगी नाही. दुसऱ्या कोणत्याही मुलीने असा छळ सहन करू नये. आम्ही फसलो, तुम्ही फसू नका,” असे आवाहन त्यांनी केले.

पोलिसांकडून तपास सुरु

शिल्पाचा मृत्यू नेमका कोणत्या परिस्थितीत झाला? हा सध्या या प्रकरणातील सर्वात मोठा प्रश्न आहे. कुटुंबीयांचे आरोप, मृत्यूची परिस्थिती, घटनास्थळीची स्थिती आणि उपलब्ध पुरावे यांची पोलिसांकडून चौकशी झाल्यानंतरच मृत्यूचे नेमके कारण स्पष्ट होणार आहे. त्यामुळे शिल्पाने आत्महत्या केली की तिचा घातपात झाला? याचा तपास आता महत्त्वाचा ठरणार आहे.