रायगड जिल्ह्यातील कर्जत तालुक्यात कर्जत कोंदिवडे या राज्य मार्गावर खड्ड्यांमुळे झालेली दुर्दशा आणि यामुळे होणारा त्रास या सगळ्याची व्यथा या विद्यार्थिनींनी आपल्या या रिपोर्टमधून मांडली आहे. हा व्हिडिओ सध्या सोशल मीडियावर तुफान व्हायरल झाला आहे.

रस्त्याने जाताना अनेक अडचणी

या रस्त्यावरील पडलेल्या खड्यांमुळे आपला प्रवास किती त्रासदायक होतो? वाहनाचा अर्धवट प्रवास थांबवून चक्क चालत जावं लागतं, इतकंच नाही तर चालत जात असताना एखादे वाहन आलं तर खड्ड्यांमुळे अंगावर उडणाऱ्या चिखलाच्या पाण्याचा मनस्ताप सहन करावा लागतो. अंगावर चिखल उडण्याची भीती असते. या भीतीच्या सावटाखाली हा प्रवास करावा लागतो. दररोज या मार्गावरून शाळेत जाणाऱ्या विद्यार्थ्यांनी अखेर रस्त्यावरील खड्ड्यांच्या त्रासाला कंटाळून या सगळ्याचं स्वतः रिपोर्टर होत याचे व्हिडिओ चित्रण केल आहे.

विद्यार्थिनी रिपोर्टर बनल्या

नेहमी शाळेत जाणाऱ्या दोन विद्यार्थिनी काही वेळासाठी रिपोर्टर बनल्या आणि त्यांनी एका आपल्या विद्यार्थिनी मैत्रिणीवर व्हिडिओग्राफर म्हणून जबाबदारी सोपवली. हातातल्या छत्रीलाच बूम बनवलं. एका विद्यार्थिनीने ही छत्री हातात धरून दुसऱ्या मैत्रिणीला या रस्त्याच्या त्रासाबद्दल प्रश्न विचारला. या विद्यार्थिनीनेही हा मार्ग म्हणजे रस्त्यात खड्डे की खड्ड्यात रस्ते हाच प्रश्न पडतो असे सांगत या रस्त्याची दुर्दशा दाखवली आहे. या शालेय विद्यार्थिनींनी अनुभवी ज्येष्ठ पत्रकारासारखे कर्जत कोंदिवडे रस्त्याच्या त्रासामुळे दररोज होणाऱ्या त्रासाची व्यथा व्यक्त केली आहे.

बांधकाम विभागाच्या कामकाजांवर प्रश्नचिन्हं

शासनाच्या सार्वजनिक बांधकाम विभागाच्या कारभाराची लक्तरच या विद्यार्थिनींनी जगासमोर मांडली आहे. कोंदिवडे भागातील दोन शालेय विद्यार्थिनी या आपल्या घरी निघाल्या होत्या. त्याचवेळी त्यांना हा व्हिडिओ काढण्याची कल्पना सुचली आणि हा त्यांनी व्हिडिओ केला आहे.

व्हिडीओ सोशल मीडियावर तुफान व्हायरल

हा व्हिडिओ सोशल मीडियावर अपलोड केल्यावर आता तो प्रचंड व्हायरल झाला आहे. देशाचे भविष्य घडवणाऱ्या या विद्यानींनी केलेला हा व्हिडिओ, यातून केलेले रस्त्यावरील खड्ड्यांचे चित्रण ही बोलकी दृश्य समोर आणली आहेत. यानंतर तरी किमान आता शासनाच्या सार्वजनिक बांधकाम विभागाने याची दखल घेत या रस्त्याची तातडीने दुरुस्ती करावी अशी मागणी आता वाहन चालक, प्रवासी आणि कर्जत तालुक्यातील नागरिकांकडून होऊ लागली आहे.

विद्यार्थिनींच्या धाडसाचे कौतुक

या विद्यार्थिनींनी दाखवलेल्या धाडसाचे कौतुक होत आहे. आवश्यक असलेल्या सार्वजनिक मूलभूत पायाभूत सुविधा मिळायल्याच हव्यात असा संदेश देणाऱ्या सजगतेचे आणि त्यांनी रस्त्यावर उतरू केलेल्या या व्हिडिओच्या माध्यमातून तालुक्यातील नागरिकांच्या जनतेच्या मांडलेले व्यथा याचे सर्वत्र कौतुक होत आहे. तसेच यामुळे शासनाच्या बांधकाम विभागातील प्रशासनाचा बेजबाबदार कारभार जनतेसमोर आला आहे.