मिळालेल्या माहितीनुसार, तळोज्यातील २३ वर्षीय तरुणाला काही एजंटांनी आकर्षक नोकरीचे आमिष दाखवत परदेशात पाठवले. कुटुंबीयांच्या म्हणण्यानुसार, बँकॉकला पोहोचल्यानंतर त्याच्याशी मोबाईलवरून संपर्क केला असता संभाषणात बदल जाणवू लागला आणि नंतर त्याला जबरदस्तीने म्यानमारमध्ये नेऊन एका टोळीच्या ताब्यात देण्यात आल्याची माहिती मिळाली. त्यानंतर त्याच्या सुटकेसाठी मोठ्या रकमेची मागणी करण्यात आली.

एकीकडे मुलाच्या जीवाची चिंता, तर दुसरीकडे कॅन्सरशी झुंज देणाऱ्या आईचे उपचार. अशा कठीण परिस्थितीतही कुटुंबाने हार मानली नाही. आईचे मंगळसूत्र, दागिने आणि घरातील मौल्यवान वस्तू विकून संबंधितांकडे सुमारे आठ लाख रुपये पाठवल्याचा दावा कुटुंबीयांनी केला आहे. मात्र एवढी मोठी रक्कम दिल्यानंतरही मुलाची सुटका न झाल्यामुळे त्यांची निराशा आणखी वाढली आहे. तरुणाचे वडील राजेश यांनी पोलीस, शासकीय कार्यालये, लोकप्रतिनिधी आणि विविध यंत्रणांकडे वारंवार मदतीची याचना केली. मात्र अद्याप कोणतीही ठोस कारवाई झालेली नसल्याचा आरोप त्यांनी केला आहे. “आमचा मुलगा जिवंत परत आणा,” एवढीच अपेक्षा असल्याचे त्यांनी सांगितले. या घटनेनंतर काही सामाजिक कार्यकर्त्यांनी कुटुंबीयांची भेट घेत संपूर्ण प्रकरणाची माहिती जाणून घेतली. मानवी तस्करीच्या संशयातून या प्रकरणाचा सर्वंकष तपास करून साहिलची सुरक्षित सुटका करण्यासाठी केंद्र सरकार, परराष्ट्र मंत्रालय, महाराष्ट्र पोलीस आणि संबंधित तपास यंत्रणांनी तातडीने समन्वय साधावा, अशी मागणी करण्यात आली आहे.

दरम्यान, या प्रकरणातील मानवी तस्करी, खंडणीची मागणी आणि आर्थिक व्यवहारांबाबतचे आरोप हे संबंधित कुटुंबीयांनी केलेले असून, त्याची अधिकृत पुष्टी अद्याप झालेली नाही. परंतु एका कुटुंबात घडलेल्या या वेदनादायी प्रसंगात संबंधित यंत्रणांनी तातडीने हस्तक्षेप करून साहिलला सुरक्षित मायदेशी परत आणावे, अशी मागणी नागरिकांतून जोर धरत आहे.