अकोला: अकोला शहरातील डाबकी रोड परिसरात लग्न झालेल्या नवविवाहितेने आत्महत्या केल्याची धक्कादायक घटना समोर आली आहे. पल्लवी प्रदीप मोरे असं आत्महत्या केलेल्या महिलेचं नाव असून या आत्महत्येप्रकरणी अकोल्यातील डाबकी रोड पोलिसांनी कारवाई करत पतीसह सासरच्या सहा जणांविरुद्ध आत्महत्येस प्रवृत्त केल्याप्रकरणी गुन्हा दाखल केला आहे. या प्रकरणात पोलिसांनी मृत विवाहितेचे सासरे दयाराम मोरे यांना अटक केली असून, इतर आरोपींचा शोध सुरू असल्याची माहिती पोलिसांनी दिली आहे.

मिळालेल्या माहितीनुसार, अकोल्यातील डाबकी रोड परिसरात राहणाऱ्या पल्लवी प्रदीप मोरे या महिलेने त्यांच्या राहत्या घरात गळफास घेत आपलं जीवन संपवलं. मुलीने आत्महत्या केल्याची माहिती मिळताच माहेरच्या लोकांना मोठा धक्का बसला. त्यानंतर माहेरच्या नातेवाईकांनी डाबकी रोड पोलीस ठाण्यात धाव घेत याबाबतची तक्रार नोंदविली. लग्नानंतर पल्लवीला सातत्याने मानसिक त्रास देत सासरच्या कुटुंबाकडून तिचा छळ केला जात असल्याचा आरोप पल्लवीच्या माहेरच्या व्यक्तींनी केला आहे. या छळामुळेच पल्लवीने टोकाचे पाऊल उचलल्याचा आरोप तक्रारीत करण्यात आला आहे.

पल्लवी यांच्या माहेरच्या नातेवाईकांनी दिलेल्या तक्रारीच्या आधारे पोलिसांनी पती प्रदीप मोरे याच्यासह सासरच्या एकूण सहा जणांविरुद्ध भारतीय न्याय संहितेतील संबंधित कलमान्वये गुन्हा दाखल केला. गुन्हा दाखल होताच पोलिसांनी तपासाची सूत्रे वेगाने हलवत तातडीने कारवाई करत पती प्रदीप मोरे आणि सासरे दयाराम मोरे यांना ताब्यात घेऊन अटक केली आहे. तसंच इतर आरोपी गीता दयाराम मोरे, संदीप दयाराम मोरे,सपना संदीप मोरे, चैताली संदेश पहुरकर हे फरार असल्याचे पोलिसांनी सांगितले.

दरम्यान, पल्लवी मोरे यांच्या आत्महत्येमागील नेमके कारण काय, त्यांना कोणत्या प्रकारचा छळ सहन करावा लागत होता, याबाबत पोलिसांकडून तपास सुरू असून फरार आरोपींचा शोध घेण्यासाठी विविध पथके रवाना करण्यात आली आहे. या प्रकरणाच्या तपासात आणखी महत्त्वाची माहिती समोर येण्याची शक्यता व्यक्त केली जात आहे. या घटनेमुळे परिसरात हळहळ व्यक्त होत आहे.