राहत रूम डेकोरेशन या इव्हेंट डेकोरेशन संस्थेने हा व्हिडीओ आपल्या सोशल मीडिया अकाउंटवर शेअर केला आहे. त्यांच्या माहितीनुसार, जालन्यातील एका नवविवाहित जोडप्यासाठी फर्स्ट एसीची केबिन बुक करण्यात आली होती. हे जोडपं छत्रपती संभाजीनगरहून कारने जालना स्थानकावर पोहोचणार होतं. त्याआधीच डेकोरेशन करणाऱ्या टीमने ट्रेनमध्ये जाऊन केबिन सजवली. त्यानंतर जालना स्थानकावरून हे जोडपं ट्रेनमध्ये चढलं.

व्हिडिओमध्ये नेमकं काय?

व्हिडीओमध्ये सुरुवातीला प्लॅटफॉर्मवर उभी असलेली ट्रेन दिसते. त्यानंतर कॅमेरा फर्स्ट एसीच्या कॉरिडॉरमधून केबिनमध्ये जातो. प्रवेशद्वाराला गुलाबी रंगाच्या सजावटीचे पडदे लावलेले दिसतात. आतमध्ये हृदयाच्या आकाराची सजावट, छताला लाल-पांढरे फुगे, जमिनीवर गुलाबाच्या पाकळ्या, खिडक्यांना फुलांच्या माळा आणि बर्थवरही फुलांची सजावट करण्यात आल्याचं दिसतं.

ट्रेनला ब्रेक लावून लोको पायलटने गरमागरम समोसे-कचोरी घेतली; व्हायरल व्हिडिओवर रेल्वे प्रशासन म्हणालं, घटना खरी, पण…

मात्र, हा व्हिडीओ व्हायरल झाल्यानंतर रेल्वे प्रशासनाने याची गंभीर दखल घेतली. रेल्वेच्या म्हणण्यानुसार, डेकोरेशन करणारे लोक कोणतीही अधिकृत परवानगी न घेता फर्स्ट एसी डब्यात गेले होते. हा रेल्वेच्या नियमांचा भंग असल्याचं प्रशासनाने स्पष्ट केलं आहे.

तिकिट निरिक्षकाचे निलंबन

या प्रकरणात ड्युटीवर असलेले मुख्य तिकीट निरीक्षक गिरीश कुमार यांना तात्काळ निलंबित करण्यात आलं आहे. नेमकी चूक कुठे झाली, डेकोरेशन टीमला डब्यात प्रवेश कसा मिळाला आणि यासाठी जबाबदार कोण, याचा शोध घेण्यासाठी विभागीय चौकशीचे आदेश देण्यात आले आहेत.

एनडीटीव्हीने दिलेल्या या वृत्तानुसार, या व्हिडीओनंतर सोशल मीडियावर संमिश्र प्रतिक्रिया उमटल्या. अनेकांनी या कल्पनेचं कौतुक करत आयुष्यातील खास क्षण अधिक संस्मरणीय करण्याचा हा वेगळा प्रयत्न असल्याचं म्हटलं. तर काहींनी रेल्वेच्या डब्यात अशा प्रकारची सजावट करण्याची परवानगी आहे का, असा प्रश्न उपस्थित केला. काही नेटकऱ्यांनी सुरक्षेचाही मुद्दा उपस्थित केला. फुगे, कागदी सजावट आणि फुलांमुळे आग लागण्याचा धोका निर्माण होऊ शकतो का, तसेच अशा प्रकारची सजावट रेल्वेच्या सुरक्षा नियमांनुसार योग्य आहे का, याबाबतही चर्चा सुरू झाली. अनेकांनी या ट्रेनला सुहागरात एक्सप्रेस तर काहींनी हनीमून ऑन व्हील्स अशी नावं दिली.