पादचाऱ्यांना फायदा होणार

वांद्रे पूर्वेला रेल्वे स्थानकाबाहेर येताच वांद्रे-कुर्ला संकुल (बीकेसी), म्हाडा, सरकारी वसाहत, भारतनगर आदी ठिकाणी जाण्यासाठी रिक्षा मिळतात. मात्र, मीटर रिक्षा आणि शेअर रिक्षांसाठी स्वतंत्र मार्ग, स्टँड नाही. परिणामी, रेल्वे स्थानकाबाहेर प्रचंड गोंधळ असतो. वाहनांच्या वर्दळीमुळे रेल्वे स्थानक परिसरात पादचाऱ्यांना वाट काढणेही कठीण होते.

काही रिक्षाचालक मनमानी कारभार करत प्रवाशांची लूट करतात. त्यामुळे वाहतूक पोलिसांचीही या भागात कारवाई करताना तारांबळ उडते. तर, प्रवाशांनाही रिक्षा सहजासहजी उपलब्ध होत नसल्याने हाल होतात. हा गोंधळ टाळता यावा, रिक्षाचालकांना शिस्त लागावी, प्रवाशांनाही रिक्षा त्वरित उपलब्ध व्हावी आणि कोंडीमुक्त प्रवासासाठी मुंबई महापालिकेच्या एच पूर्व वॉर्डकडून रिक्षांसाठी स्वतंत्र मार्गिका आणि स्टँड उभारण्याचा निर्णय घेण्यात आला आहे. यासाठी वाहतूक पोलिसांशीही चर्चा करण्यात आली आहे.

Mumbai News: वांद्रेतील गरीबनगर परिसरात रिक्षाचालकांचा कब्जा, अतिक्रमण हटवल्यावरही कोंडी कायम; प्रवाशांची दररोज गैरसोय

एच पूर्व वॉर्डच्या सहायक आयुक्त मृदुला अंडे यांनी मुंबई महापालिका आयुक्त अश्विनी भिडे यांच्याकडे दहा दिवसांपूर्वीच प्रस्ताव सादर केला आहे. वांद्रे पूर्व रेल्वे स्थानकाबाहेर पडताच बस स्थानक आहे. त्याच्या काही अंतर पुढे जाताच रिक्षांसाठी तीन मार्गिका आणि स्टँड करण्याचे प्रस्तावित करण्यात आले आहे.

वांद्रे पश्चिमेला रिक्षांसाठी स्वतंत्र जागा उपलब्ध केल्याने स्थानकाबाहेरील प्रवास कोंडीमुक्त झाला आहे. तशाच प्रकारचे नियोजन वांद्रे पूर्वेला प्रस्तावित असल्याची माहिती सूत्रांनी दिली. त्यामुळे बस आणि रिक्षांची एकाच ठिकाणी गर्दी होणार नाही आणि प्रवाशांना सहजपणे रिक्षा उपलब्ध होतील. या भागातील अतिक्रमणही हटवण्यात आले असून, त्याचाच फायदा घेत या प्रस्तावाला गती दिली जात आहे. महापालिका आयुक्तांनी यावर शिक्कामोर्तब केल्यास पावसाळ्यानंतर या कामाचे नियोजन केले जाणार आहे.

Chembur Station: एकाच ठिकाणी मेट्रो आणि मोनोरेल स्थानक, चेंबूरमधून प्रवास सोपा होणार; ‘इंटरचेंज’मुळे फायदा

दुसऱ्या टप्प्यात उन्नत मार्ग

वांद्रे पूर्वेला गरीबनगर भागातील रेल्वेच्या हद्दीतील झोपड्या हटवल्यानंतर या भागात मोकळी जागा निर्माण झाली आहे. त्यामुळे महापालिकेच्या एच पूर्व वॉर्डकडून पश्चिम रेल्वेच्या मदतीने गरीबनगर येथून न्यायालयापर्यंत पश्चिम द्रुतगती मार्गाला जोडणारा उन्नत मार्ग करण्याचे नियोजन केले जात आहे. या भागात न्यायालय, महावितरण कार्यालय असून पुढे बीकेसी परिसरात मोठ्या प्रमाणात कार्यालये आहेत. भविष्यात वांद्रे सरकारी वसाहत भागात न्यायालयही होणार आहे. त्यामुळे रेल्वे स्थानकाबाहेर बरीचशी वर्दळ वाढणार आहे. स्थानकाबाहेरील या कोंडीमुक्त प्रवासासाठी रेल्वेच्या मदतीने उन्नत मार्गाच्या पर्यायाचेही नियोजन असल्याची माहिती सूत्रांनी दिली.