राज्यातील स्थानिक स्वराज्य संस्थांच्या विधान परिषदेच्या १७ जागांसाठी आयोगाकडून निवडणूक कार्यक्रम जाहीर करण्यात आला आहे. अधिकाधिक जागा लढविण्याचा भाजपचा आग्रह होता. तर, मित्रपक्ष असलेल्या शिवसेनेने ७ जागांची मागणी लावून धरली होती. त्यासाठी शिंदे यांनी थेट दिल्ली गाठत भाजपच्या केंद्रीय नेतृत्वासोबत चर्चा केली. मात्र, शिवसेनेला चार जागांवर समाधान मानावे लागले. यात ठाणे, नाशिक, परभणी-हिंगोली आणि यवतमाळ या मतदारसंघांचा समावेश आहे. शिंदे यांचा बालेकिल्ला असलेल्या ठाण्यासाठी कोकणच्या जागेवरील दावा सोडावा लागला. मात्र, बदल्यात रायगडचे पालकमंत्रिपद शिवसेनेला मिळणार असल्याचे समजते.

राष्ट्रवादीला पुणे आणि रायगड-रत्नागिरी-सिंधुदुर्ग या दोन जागा मिळाल्या आहेत. यातील रायगड-रत्नागिरी-सिंधुदुर्ग या जागेवर पक्षाचे प्रदेशाध्यक्ष सुनील तटकरे यांचे पुत्र अनिकेत तटकरे यांना उमेदवारी दिली जाणार आहे. या मतदारसंघात शिवसेनेचे आमदार महेंद्र दळवी यांची कन्या जुईली यांनी अपक्ष म्हणून अर्ज दाखल केला आहे.

भाजपच्या यादीत सुळे यांचे व्याही

भाजपने रविवारी रात्री उशिरा उमेदवारांच्या नावाची घोषणा केली. यात सुप्रिया सुळे यांचे होणारे व्याही अरुण लखानी यांना वर्धा-चंद्रपूर-गडचिरोलीतून उमेदवारी देण्यात आली आहे. सुप्रिया यांच्या कन्या रेवती सुळे लवकरच विवाहबंधनात अडकणार असून सारंग अरुण लखानी यांच्यासोबत लग्नगाठ बांधणार आहेत. त्या नागपूरच्या सूनबाई होणार आहेत. अरुण लखानी नागपुरातील विश्वराज इन्फ्रास्ट्रक्चर लिमिटेडचे अध्यक्ष आहेत. केंद्रीय मंत्री नितीन गडकरी आणि मुख्यमंत्री देवेंद्र फडणवीस यांचे ते निकटवर्तीय मानले जात असून या दोघांच्या मध्यस्थीनेच रेवती-सारंगचे लग्न जुळल्याची माहिती आहे.
Suman Kalyanpur Death : प्रिय मैत्रिणीच्या निधनाने अतीव दुःख, सुमन कल्याणपूर यांचा अलविदा, उषा मंगेशकर यांना शोक अनावर

तनपुरेंनाही संधी

याशिवाय भाजपमध्ये दाखल झालेल्या प्राजक्त तनपुरे यांना अहिल्यानगर येथून उमेदवारी जाहीर केली आहे. नागपूर पोटनिवडणुकीसाठी डॉ. राजीव पोतदार यांना संधी मिळाली आहे. सांगली-सातारा मतदारसंघातून धैर्यशील कदम, अमरावतीतून प्रवीण पोटे पाटील, सोलापुरातून राजेंद्र राऊत, तर नांदेडमधून अमर राजूरकर यांना संधी दिली आहे. छत्रपती संभाजीनगर-जालना सुहास शिरसाट, नांदेडमधून अमर राजूरकर, धाराशिव-लातूर-बीडमधून बसवराज पाटील, जळगावातून नंदकिशोर महाजन यांना उमेदवारी देण्यात आली आहे.

ठाकरेंकडून उमेदवारी जाहीर

शिवसेना उद्धव बाळासाहेब ठाकरे पक्षाकडून परभणी-हिंगोली मतदारसंघातून डॉ. विवेक नावंदर तर रायगड-रत्नागिरी-सिंधुदुर्ग मतदारसंघातून सुरेंद्र उर्फ बाळ माने यांना उमेदवारी जाहीर केली आहे.

तटकरे शिंदे यांच्या भेटीला

राष्ट्रवादी काँग्रेसचे प्रदेशाध्यक्ष सुनील तटकरे आणि त्यांचे पुत्र अनिकेत तटकरे यांनी शनिवारी रात्री उशिरा उपमुख्यमंत्री एकनाथ शिंदे यांची भेट घेतली. या भेटीत विधान परिषदेच्या रायगडच्या जागेसंदर्भात एकमत झाल्याचे कळते. यासंदर्भात ‘महाराष्ट्र टाइम्स’ने प्रथम वृत्त दिले होते. तटकरे आज, सोमवारी उमेदवारी अर्ज दाखल करणार आहेत.
Vidhan Parishad : पुण्यात पुन्हा राष्ट्रवादी vs राष्ट्रवादी! पवारांनी सूचना देताच कार्यकर्ते कामाला, महायुतीला ‘महागात’ पडणार?

शिवसेनेकडे सर्वाधिक मते

कोकण स्थानिक स्वराज्य संस्थेत मोठा पक्ष शिवसेना आहे. सेनेकडे सुमारे ३०५ मते आहेत. भाजपकडे २७६, राष्ट्रवादीकडे ११५, शिवसेना उबाठाची ५० ते ५५ मते आहेत.