पुणे: पुण्यासह पिंपरी चिंचवड शहरात मिथेनॉल मिश्रित विषारी गावठी दारू प्यायल्यामुळे मागील दोन दिवसांत तब्बल २२ जणांना आपला जीव गमवावा लागला. या गंभीर घटनेनं राज्यभरात खळबळ उडालेली असतानाच राज्याच्या अन्न व औषध प्रशासन विभागाने (FDA) या घटनेची पाळेमुळे खणून काढण्यास सुरुवात केली आहे. अन्न व औषध प्रशासन विभागाचे आयुक्त तुकाराम मुंढे यांच्या आदेशानंतर भिवंडीत कारवाई करण्यात आली असून मिथेनॉलचा मोठा साठा जप्त करण्यात आला.
मिळालेल्या माहितीनुसार, पुणे आणि परिसरात अनेकांच्या मृत्यूला कारणीभूत ठरणारी विषारी दारू ज्या केमिकलच्या साहाय्याने बनवण्यात आली होती, त्या केमिकलचा मोठा साठा भिवंडीत असल्याचं तपासात समोर आलं होतं. त्यानंतर अन्न व औषध प्रशासनाने तात्काळ भिवंडीतील ‘मे. रेक्स इंटरनॅशनल’ कंपनीच्या गोडाऊनवर छापा टाकला. या छाप्यात प्रशासनाकडून जवळपास 5 हजार 929 किलोग्रॅम इतका इथेनॉलचा प्रचंड मोठा साठा जप्त केला गेला. पुण्यात जी विषारी दारू विकण्यात आली ती बनवण्यासाठीचे मुख्य रसायन याच कंपनीकडून पुरवण्यात आलं होतं, अशी माहिती आहे. त्यामुळे हा साठा अन्न व औषध प्रशासनाने जप्त केल्याने समाधान व्यक्त केलं जात आहे.
पुण्यात नेमकं काय घडलं?
पुणे जिल्ह्यातील दापोडी परिसरातील एका हातभट्टी अड्ड्यावर मंगळवारी रात्री व बुधवारी सकाळी नागरिकांनी गावठी दारू प्यायली. ही दारू प्यायल्यानंतर संबंधित लोकांना डोळ्यांची जळजळ, चक्कर येणे, अंधारी येणे, श्वसनास त्रास, छातीत दुखणे व तोंडातून फेस येणे अशी लक्षणे जाणवू लागली. यामुळे काहींची प्रकृती बिघडल्यामुळे त्यांना रुग्णालयात नेण्यात आलं. परंतु रुग्णालयात पोहोचण्याआधीच काही जणांना आपले प्राण गमवावे लागले. आतापर्यंत २२ जणांचा मृत्यू झाला असून अजूनही काही जणांची प्रकृती गंभीर असल्याने मृतांचा आकडा वाढण्याची भीती व्यक्त केली जात आहे.
तुकाराम मुंढेंच्या एंट्रीनंतर FDA च्या कारवाईला वेग
तुकाराम मुंढे यांनी अन्न व औषध प्रशासनाच्या आयुक्तपदाची सूत्रे हाती घेतल्यानंतर भेसळ करणाऱ्यांचे धाबे दणाणले आहेत. सर्वसामान्यांच्या आरोग्याशी खेळ करणाऱ्या भ्रामक; तसेच दिशाभूल करणाऱ्या जाहिराती प्रसिद्ध करणे आणि अवैध औषध उत्पादन व विक्रीविरुद्ध कारवाई करण्याची धडक मोहीम अन्न व औषध प्रशासनाने (एफडीए) हाती घेतली आहे. याअंतर्गत आक्षेपार्ह जाहिराती असलेला ७३ लाख २४ हजार ६५६ रुपये किमतीचा औषधसाठा राज्यभरातून जप्त करण्यात आला आहे; तसेच सात जिल्ह्यांतील १२ आयुर्वेदिक औषधविक्री आस्थापनांवर कारवाई करण्यात आल्याची माहिती ‘एफडीए’च्या वतीने देण्यात आली आहे. मुंबई, पुणे, नागपूर, कोकण, नाशिक, अमरावती, छत्रपती संभाजीनगर, पुणे येथे मे. दिव्या फार्मसी यांच्या उत्पादनाच्या औषधांचा साठा जप्त करण्यात आला असून हरिद्वार (उत्तराखंड) येथे मे. दिव्या फार्मसीच्या औषधांचा सात लाख २६ हजार ७५५ रुपये, नाशिक येथे सात लाख १० हजार ९४५, पुणे येथे १४ लाख ६८ हजार ९८१, मुंबई येथे एक लाख ८५ हजार ६००, कोकण विभागात १८ लाख ५८ हजार, अमरावती येथे एक लाख ४२ हजार २२९, छत्रपती संभाजीनगर येथे ४८ हजार ७१८ रुपये किमतीचा साठा जप्त करण्यात आला. पुण्यात दोन ॲलोपॅथीसदृश औषधांचा २१ लाख ४२८ रुपयांचा साठा ताब्यात घेण्यात आला.