म. टा. विशेष प्रतिनिधी, नाशिक: विधान परिषदेच्या नाशिक स्थानिक स्वराज्य संस्था मतदारसंघासाठीची निवडणूक प्रक्रिया सुरू होऊन तीन दिवस लोटले तरी, महायुती आणि महाविकास आघाडीचे जागावाटप ठरत नसल्याने इच्छुकांची चलबिचल वाढली आहे. तर नाशिक आणि संभाजीनगरपैकी एक जागा भाजपला हवी आहे. त्यामुळे हा वाद जागेवरून महायुतीचे घोडे अडले असून, हा वाद थेट केंद्रीय गृहमंत्री अमित शहांपर्यंत पोहोचला आहे. महाविकास आघाडीतही नाशिकची जागा शिवसेना ‘उबाठा’ने लढावी की, राष्ट्रवादी काँग्रेस शरद पवार पक्षाने, याबाबत उद्या, शुक्रवारी (दि.२९) निर्णय होण्याची शक्यता आहे.
राज्यात स्थानिक स्वराज्य संस्था मतदारसंघातील एकूण १७ जागांसाठी ही निवडणूक होत आहे. या जागेसाठी सोमवार (दि.२५)पासून अर्ज दाखल करण्यास सुरुवात झाली. मात्र, महायुतीत जागावाटपाचा पेच अद्याप सुटत नसल्याचे चित्र आहे. महायुतीत १७ पैकी १४ जागांच्या जागावाटपाचा पेच सुटल्यात जमा आहे. दुसरीकडे नाशिकसह छत्रपती संभाजीनगर आणि पुणे या तीन जागांचा पेच कायम आहे. महायुतीच्या समन्वय समितीच्या मंगळवारी (दि. २६) रात्री झालेल्या बैठकीतही तोडगा निघालेला नाही. भाजपने संख्याबळाच्या आधारे नाशिकच्याही जागेवर दावा ठोकला आहे. तर, शिवसेना शिंदे गट नाशिकवरचा दावा सोडण्यास तयार नाही. त्यामुळे भाजपने नाशिकच्या बदल्यात छत्रपती संभाजीनगरची मागणी केली आहे. ‘शिवसेनेसोबत नाशिक आणि छत्रपती संभाजीनगर यांपैकी एक जागा आम्हाला मिळाली पाहिजे, असा आमचा आग्रह आहे. तर राष्ट्रवादी काँग्रेसने आमच्याकडून पुण्याची जागा मागितली आहे. या दोनच गोष्टींवर आमचे अडले आहे,’ असे मुख्यमंत्री देवेंद्र फडणवीस यांनी अमित शहा यांची भेट घेतल्यानंतर स्पष्ट केले आहे. त्यामुळे नाशिकची जागा भाजप लढणार की, शिवसेना याचा ‘सस्पेन्स’ अद्यापही कायम आहे.
…यांच्याकडून अर्ज खरेदी
विधान परिषदेच्या स्थानिक प्राधिकरण मतदारसंघ निवडणुकीसाठी बुधवारी तिसऱ्या दिवशीही एकही उमेदवारी अर्ज दाखल झाला नाही. जिल्हाधिकारी कार्यालयातील निवडणूक कक्षातून दिवसभरात राष्ट्रवादी काँग्रेस अजित पवार गटाकडून इच्छुक निवृत्ती बोडके, भाजपकडून इच्छुक बाळकृष्ण माळी, भूषण कासलीवाल यांनी अर्ज खरेदी केले. याशिवाय विजय धारराव यांनी अपक्ष अर्ज खरेदी केला.
नाशिकच्या जागेवरून भाजप शिवसेनेत रस्सीखेच सुरू असताना चांदवडमधून भाजपचे नेते भूषण कासलीवाल यांनीही विधान परिषदेसाठी अर्ज घेतला आहे. कासलीवाल यांनी थेट गुजरात ‘कनेक्शन’ वापरले आहे. तर मुख्यमंत्र्यांनीही नाशिकचा निर्णय झाला नसल्याचे सांगितले आहे.
दरम्यान, दुसरीकडे, जळगाव विधान परिषदेची जागा सध्या भाजपकडे आहे. स्थानिक स्वराज्य संस्थांमध्ये महायुतीचे वर्चस्व आहे. मात्र, त्यात भाजपकडील मतांची संख्या जास्त असल्याने जागा आपल्याकडेच रहावी यासाठी भाजपकडून मोर्चेबांधणी केली जात आहे. माजी खासदार डॉ. उल्हास पाटील यांच्या कन्या डॉ. केतकी पाटील, नंदकुमार अडवाणी, पाचोऱ्याचे पदाधिकारी अमोल शिंदे यांच्या नावाची चर्चा आहे. शिवसेनेकडून पालकमंत्री गुलाबराव पाटील यांचे पुत्र प्रतापराव पाटील इच्छुक आहेत. त्यामुळे शिवसेनेनेदेखील जोरदार मोर्चेबांधणी सुरू केली आहे. भाजप जागा देणार नसेल, तर मैत्रीपूर्ण लढण्याची तयारीही शिवसेनेच्या आमदारांनी केली आहे.