प्रवास त्रासदायक

मुंबईच्या छत्रपती शिवाजी महाराज आंतरराष्ट्रीय विमानतळापर्यंत प्रवास करताना वाहतूककोंडीला तोंड द्यावे लागत असल्याने, पूर्व उपनगरे, नवी मुंबईतील प्रवाशांना नवी मुंबई विमानतळाचा पर्याय अधिक सोईस्कर ठरेल, अशी अपेक्षा होती. मात्र नवी मुंबई विमानतळापर्यंत जाणे तुलनेने सोपे ठरत असले, तरी विमानतळावरून नियोजित ठिकाणापर्यंतचा प्रवास त्रासदायक ठरत असल्याचा अनुभव प्रवाशांना येत आहे.

Navi Mumbai Water Cut: नवी मुंबईत 10 टक्के पाणीकपात; 25 मेपासून दोन दिवस संध्याकाळचा पुरवठा बंद, कोणत्या भागांना फटका?

मुलुंडमध्ये राहणाऱ्या विजय लाड यांनी अलिकडेच, नवी मुंबई विमानतळावरून मुलुंडपर्यंतचा प्रवास दोन वेळा केला. दोन्ही वेळा त्यांना ओला, उबरसारख्या टॅक्सींची कमतरता असल्याचे निदर्शनास आले. ‘दोन्ही वेळा भर उकाड्यात सुमारे पाऊण ते एक तास टॅक्सीसाठी रांगेत उभे राहिल्याचा अनुभव त्यांनी सांगितला. नवी मुंबई विमानतळापासून पनवेल, नेरूळ, बेलापूरपर्यंत बस आहेत. मात्र सोबत सामान असताना बसने रेल्वे स्थानकापर्यंत जाणे हा पर्याय सोयीस्कर ठरत नाही. ओला, उबरसाठी नोंदणी केल्यावर लगेच टॅक्सी मिळत नाही. तसेच यासाठी मुंबईहून मुलुंडला येताना लागणाऱ्या भाड्याच्या दुप्पट भाडे आकारले’, असे त्यांनी सांगितले. रात्रीच्या वेळी या भागात शुकशुकाट असल्याने, एकटी महिला या विमानतळावरून प्रवास करू शकेल का, असाही प्रश्न त्यांनी केला.

सामान घेऊन जाताना अडचणी

नवी मुंबईकरांना या विमानतळावर पोहोचण्यासाठी फारसा वेळ लागत नाही. मात्र विमानतळावर रिक्षांना आत जायला परवानगी नसल्याने अडचण निर्माण होत असल्याचे नवी मुंबईतील एका प्रवाशाने सांगितले. रिक्षा स्टँडजवळ विमानतळावर जाण्यासाठी बस उभ्या असतात. मात्र रिक्षातून सामान उतरवून बसमध्ये चढवणे, विशेषतः ज्येष्ठांसाठी जिकिरीचे होते, याकडे त्यांनी लक्ष वेधले.

नवी मुंबई विमानतळावरून दादरपर्यंत टॅक्सीचा खर्च अडीच ते तीन हजार रुपये दिसल्याचे सांगत ज्येष्ठ पत्रकार मृण्मयी रानडे यांनी नवी मुंबई विमानतळावरून नियोजित स्थळी जाण्याचा अनुभव सोशल मीडियावर मांडला आहे. मुलुंडला पोहोचण्यासाठी विविध टॅक्सीसेवांचा दर त्यांना ८५० ते एक हजार १०० या दरम्यान दिसत होता. अनेकदा मिनी टॅक्सी बुक केल्यावर, सेडान किंवा प्रीमिअम समोर येऊन उभी राहते आणि मग पुन्हा मिनीसाठी वाट पाहावी लागते, असेही निरीक्षण त्यांनी नोंदवले.

‘सुपर हायवे’ पुन्हा लांबणीवर; निधीअभावी Mumbai-Pune Expresswayचं दहापदरीकरण रखडणार, 16 हजार कोटी रुपयांचा खर्च अपेक्षित

तोडगा अपेक्षित

नवी मुंबई विमानतळावरून पुढील काही दिवसांत आंतरराष्ट्रीय उड्डाणे सुरू होणे अपेक्षित असताना, प्रवासाच्या सुविधेमध्ये सुधारणांची अपेक्षा व्यक्त होत आहे. टॅक्सी मिळण्यासाठी लागणारा वेळ, विमानतळापासून मुख्य रस्त्यापर्यंत येताना निर्मनुष्य परिसरामुळे वाटणारी धास्ती, यावर तोडगा काढणे गरजेचे असल्याचे त्यांनी सांगितले.