या पुस्तकाचे विद्यमान प्रकाशक प्रशांत आंबी यांना आमदार गायकवाड यांनी बुधवारी रात्री शिवीगाळ केली. जीवे मारण्याची धमकी दिली. त्यामुळे त्यांच्यावर गुन्हा दाखल करावा म्हणून आंबी यांनी गुरुवारी कोल्हापुरातील राजारामपुरी पोलिस ठाण्यात तक्रार केली. पण, २४ तासानंतरही गुन्हा दाखल करण्याची कोणतीच प्रक्रिया पोलिसांनी सुरू केली नाही. यामुळे कोल्हापुरातील अनेक कार्यकर्ते संतप्त झाले. त्यांनी पोलिस ठाण्यात धडक दिली. पोलिस अधिकारी सतीश होडगर यांना धारेवर धरले.

Bageshwar Baba : ‘शिवाजी महाराज युद्ध लढून थकले अन् रामदास स्वामींना म्हणाले राजपाट सांभाळा’, बागेश्वर बाबांचं वक्तव्य
आमदार पवार दुपारी कोल्हापुरात दाखल झाले. त्यांनी पानसरे यांच्या निवासस्थानी भेट दिली. तेथून दुचाकीने पोलिस ठाण्यात पोहोचले. यावेळी त्यांच्या समवेत राष्ट्रवादी शरद पवार गटाचे जिल्हाध्यक्ष व्ही. बी. पाटील, शहराध्यक्ष आर. के. पोवार, विजय देवणे, राजू लाटकर यांच्यासह अनेक कार्यकर्ते उपस्थित होते. प्रकाशक आंबी यांच्यासह पानसरे कुटुंबातील सदस्यही यावेळी त्यांच्या समवेत होते. सुमारे दीड तास या सर्वांनी पोलिस अधिकारी होडगर यांच्याकडे गायकवाड यांच्यावर गुन्हा दाखल करण्याचा आग्रह धरला.

‘आमदार संजय गायकवाड यांनी व्यक्त केलेली दिलगिरी मान्य नाही. त्यांनी छत्रपती शिवाजी महाराज, कॉम्रेड पानसरे यांचा अवमान केला आहे. त्यामुळे त्यांच्यावर गंभीर गुन्ह्याची कलमे दाखल करून कठोर कारवाई व्हावी यासाठी पाठपुरावा सुरू राहील,’ असे या पुस्तकाचे प्रकाशक प्रशांत आंबी म्हणाले.

दरम्यान, काँग्रेस टनेते विजय वडेट्टीवार यांनी मुख्यमंत्री फडणवीस यांना पत्र लिहिले. शिवसेना आमदार संजय गायकवाड यांच्याविरुद्ध गुन्हे दाखल करण्याची मागणी या पत्राद्वारे केली. गायकवाड यांनी प्रशांत आंबी यांना दिलेल्या धमकीचा निषेध केला. हे अभिव्यक्ती स्वातंत्र्यावर थेट आक्रमण आहे, असे वडेट्टीवार यांनी नमूद केले. दरम्यान, ‘आमदार संजय गायकवाड त्यांच्याबाबत जे काही करायचे आहे, ते शिंदेच करतील,’ असे भाजपचे प्रदेशाध्यक्ष रवींद्र चव्हाण प्रसारमाध्यमांना सांगितले.

गायकवाड म्हणतात, ‘अपमान सहन करणार नाही’
बुलढाणा : ‘शिवाजी महाराज यांचा कुठेही उल्लेख करताना ‘श्री छत्रपती शिवाजी महाराज’ असाच केला जातो. यापूर्वीसुद्धा विधानसभेत राज्यातील जेवढ्याही संस्थांना ‘शिवाजी’ हे नाव आहे, त्यांना छत्रपती शिवाजी महाराज या नावाची दुरुस्ती करावी, अशी मागणी केली होती. शिवाजी शिक्षण संस्थेचे नाव बदलावे आणि ‘छत्रपती’ असे जोडावे; शिवरायांचा अवमान करू नये, असे सांगितले होते. शिवरायांच्या विचाराने जगणारे आणि मरणारे आम्ही लोक आहोत. त्यांचा पदोपदी अपमान सहन करणार नाही. या पुस्तकात पाचशे ते सातशे वेळेस ‘शिवाजी’ असा एकेरी उल्लेख केला आहे. ‘शिवाजी महाराज मराठा वंशाचे नव्हतेच,’ असेही त्यामध्ये म्हटले आहे. आणखी काही आक्षेपार्ह बाबी आहेत. या दुरुस्त व्हायला हव्यात,’ असे गायकवाड यांनी म्हटले आहे.