जिल्हा परिषद अध्यक्ष निवडीच्या आदल्या रात्री (गुरूवारी) वाई तालुक्यातील एका सदस्याचे अपहरण करण्यात आल्याची तक्रार महाबळेश्वर पोलीस ठाण्यात दाखल करण्यात आली होती. संबंधित सदस्याने पोलीस ठाण्यात हजर होऊन अपहरण झाले नसल्याचा जबाब दिला होता. तरीही पोलीस दोन सदस्यांना ताब्यात घेणार असल्याची कुणकुण पालकमंत्र्यांना लागली होती. त्यामुळे शंभूराज देसाई पहिल्यांदा जिल्हा परिषदेत आले. पोलिसांचे मनसुबे ध्यानात येताच त्या दोन सदस्यांना सायरन वाजवत थेट स्वतःच्या गाडीतून घेऊन आले.

पालकमंत्री शंभूराज देसाईंचा आवेश पाहून पोलिसांनी त्यांना अडवले नाही. परंतु, जिल्हा परिषदेच्या सभागृहाच्या बाहेरच दोन्ही सदस्यांना पोलिसांनी ताब्यात घेतले. त्यावेळी पोलीस आणि पालकमंत्री शंभूराज देसाई यांच्यात झटापट झाली. त्यात त्यांच्या हातात लागले आणि रक्त आले. त्यानंतर राष्ट्रवादीच्या एका सदस्याला मंत्री शिवेंद्रराजे भोसले ताब्यात घेण्याचा प्रयत्न करत असताना शंभूराजे आणि शिवेंद्रराजे यांच्यात जोरदार शाब्दिक चकमक झाली.

राष्ट्रवादीच्या त्या दोन सदस्यांना मतदान करू द्या आणि मग कारवाई करा, असे शंभूराज देसाई सांगत होते. मात्र, पोलीस आणि निवडणूक अधिकाऱ्यांनी त्यांचे ऐकून घेतले नाही. दोन्ही सदस्यांना मतदान करता न आल्याने राष्ट्रवादी आणि शिवसेनेचे संख्याबळ आणखीनच घटले. अखेर भाजपचे अध्यक्ष आणि उपाध्यक्ष पदाचे उमेदवार तीन मतांनी विजयी झाले.

जिल्हा परिषद अध्यक्ष निवडीच्या निमित्ताने महायुतीत आता दरी निर्माण झाली असून नेत्यांमधील संबंध देखील ताणले गेले आहेत. निवड प्रक्रियेनंतर माध्यमांशी बोलताना शंभूराज देसाई यांनी भाजपाला गर्भित इशारा दिला. जिल्हा प्रशासनाच्या मदतीने जनमताचा अवमान भाजपाने केला आहे. या क्षणिक सुखाचा आनंद मिळेल. पण, पुढे अनेक निवडणुका आहेत. त्यावेळी आम्ही आमची भूमिका घेऊ. साताऱ्यातील पोलीस मंत्र्यांना धक्काबुक्की आणि मागे ढकलत असतील तर प्रशासन नक्कीच घरगड्याचे काम करतंय. आजच्या घटनेतून भाजपाने सुरुवात केली आहे. परंतु,त्याचा शेवट शिवसेना आणि राष्ट्रवादी करेल, असा थेट इशाराच त्यांनी दिला.