नेमकं काय घडलं?

माहितीनुसार, वंदना देवीकर (वय ६४) या २७ जानेवारी रोजी सकाळी साडेसात वाजताच्या सुमारास सन्मान नगर येथील आपल्या घरासमोर स्वच्छता करत होत्या. त्याच वेळी रस्त्यावर मोकाट फिरणारा एक वळू अचानक त्यांच्या दिशेने धावत आला. काही समजण्याआधीच वळूने त्यांना जोरदार धडक देत जमिनीवर आपटले आणि शिंगांनी तुडवत गंभीर जखमी केले. हल्ला इतका अचानक आणि भीषण होता की शेजाऱ्यांना मदतीला धाव घेण्याची संधीही मिळाली नाही.
Pune Crime : पुण्यात मसाज पार्लरवर पोलिसांची धाड, इमारतीतून उडी मारल्याने महिलेचा मृत्यू, पतीच्या मागणीनंतर CID चौकशी

मेंदूला गंभीर दुखापत

आरडाओरड ऐकून परिसरातील नागरिकांनी तत्काळ धाव घेत वळूला हुसकावून लावले आणि गंभीर जखमी अवस्थेत देवीकर यांना जवळच्या खासगी रुग्णालयात दाखल केले. तपासणीत त्यांच्या बरगड्या व हात-पायांतील हाडे मोडल्याचे स्पष्ट झाले. डोक्याला जबर मार लागल्याने मेंदूला गंभीर दुखापत झाली आहे. त्यांच्यावर तातडीने शस्त्रक्रिया करण्यात आली असून त्या जवळपास तीन आठवडे अतिदक्षता विभागात मृत्यूशी झुंज देत होत्या. सध्या त्या घरीच उपचार घेत असून कृत्रिम ऑक्सिजनच्या सहाय्याने त्यांची प्रकृती स्थिर ठेवण्याचा प्रयत्न सुरू आहे.

वळू अजूनही मोकाट

दरम्यान, हल्ला करणारा वळू अद्याप त्याच परिसरात मोकाट फिरत असल्याचा आरोप स्थानिक नागरिकांनी केला आहे. या घटनेनंतर परिसरात भीतीचे वातावरण असून लहान मुले, ज्येष्ठ नागरिक आणि महिला घराबाहेर पडताना घाबरत आहेत. नागरिकांनी महानगरपालिकेच्या जनावर पकडणाऱ्या पथकाच्या कार्यक्षमतेवर प्रश्नचिन्ह उपस्थित केले आहे.
Nagpur Crime : 32 वर्षीय सख्ख्या मामीसोबत किळसवाणं कृत्य, 30 वर्षीय भाच्याला अटक, बेडवर झोपल्याचं भासवून घाणेरडं काम

मोकाट जनावरांचा वाढता त्रास

शहरातील विविध भागांत मोकाट जनावरांचा त्रास वाढत असल्याच्या तक्रारी सातत्याने समोर येत आहेत. रस्त्यांवरील वाहतुकीला अडथळा, अपघातांचा धोका आणि अशा प्रकारचे जीवघेणे हल्ले यामुळे नागरिकांची सुरक्षा धोक्यात आली आहे. मात्र, प्रतिबंधात्मक कारवाई आणि जनावरांच्या कायमस्वरूपी बंदोबस्ताबाबत ठोस उपाययोजना होत नसल्याची नाराजी व्यक्त होत आहे. वंदना देवीकर यांच्यावर झालेला हा हल्ला केवळ एक अपघात नसून शहरातील मोकाट जनावरांच्या समस्येचे गंभीर चित्र आहे. प्रशासनाने तातडीने पावले उचलून नागरिकांच्या सुरक्षिततेला प्राधान्य द्यावे.