बुधवारी रसायनशास्त्राचा पेपर सुरू असताना एका विद्यार्थिनीच्या हालचालींवरून पर्यवेक्षक शिक्षिकेला संशय आला. संबंधित विद्यार्थिनी वारंवार प्रसाधनगृहात जात असल्याचे लक्षात येताच तिची तपासणी करण्यात आली. त्यावेळी तिच्याकडून स्मार्टफोन जप्त करण्यात आला. मोबाईलची पाहणी केली असता, परीक्षा सुरू होण्यापूर्वीच एका व्हॉट्सअ‍ॅप ग्रुपवर प्रश्नपत्रिका शेअर झाल्याचे आढळले. त्याच ग्रुपवर संभाव्य उत्तरांचाही आदानप्रदान झाल्याचे समोर आले.

केंद्रप्रमुखांनी तत्काळ पोलिसांना कळविल्यानंतर विद्यार्थिनीची चौकशी करण्यात आली. तिच्या जबाबावरून आणखी एका विद्यार्थिनीची चौकशी करण्यात आली. प्राथमिक तपासात एका खाजगी शिकवणीशी संबंधित व्यक्तीने पैशांच्या मोबदल्यात प्रश्नपत्रिका उपलब्ध करून दिल्याचा संशय व्यक्त होत आहे. पोलिसांनी संबंधिताविरुद्ध गुन्हा नोंदवून मोबाईल व ग्रुपमधील संदेशांचा तांत्रिक तपास सुरू केला आहे. ही प्रश्नपत्रिका नागपूरमधील केवळ एका केंद्रापुरती मर्यादित नसून राज्यातील इतर भागांपर्यंतही पोहोचल्याची शक्यता तपासली जात आहे. प्रश्नपत्रिका नेमकी कुठून बाहेर पडली, त्यासाठी कोणते तांत्रिक माध्यम वापरण्यात आले आणि या जाळ्यात आणखी कोणाचा सहभाग आहे, याचा सखोल तपास सुरू आहे.

दरम्यान, या घटनेमुळे परीक्षा प्रक्रियेतील सुरक्षाव्यवस्थेबाबत गंभीर प्रश्न उपस्थित झाले असून, जबाबदारांवर कडक कारवाईची मागणी होत आहे.