चंद्रपूर महापालिका निवडणुकीचा निकाल १६ जानेवारीला लागला. ६६ सदस्य संख्या असलेल्या महापालिकेत काँग्रेसला सर्वाधिक २७ जागा मिळाल्या. तर भाजपला २३ जागांवर यश मिळालं. सत्ता स्थापनेसाठी ३४ चा आकडा गाठणं गरजेचं होतं. ठाकरेंच्या शिवसेनेनं ६ जागा मिळवल्या होत्या. त्यांच्या साथीनं सत्तेचा सोपान गाठणं काँग्रेसला शक्य होतं. पण अंतर्गत गटबाजीमुळे काँग्रेसनं सत्ता गमावली. काँग्रेसमधील बेबनावाचा फायदा घेत भाजपनं चंद्रपुरात सत्ता आणली.

काँग्रेसच्या खासदार प्रतिभा धानोरकर आणि माजी विरोधी पक्षनेते, काँग्रेसचे आमदार विजय वडेट्टीवार यांच्यातील संघर्षामुळे पक्षाच्या हातून सत्ता निसटली. या दोन्ही नेत्यांमधील संघर्षामुळे नगरसेवक दोन गटांत विभागले गेले. दोन्ही नेत्यांनी आपापल्या गटातील नगरसेवकांची व्यवस्था वेगवेगळ्या ठिकाणी केली. दोन दिग्गज नेत्यांमधील खेचाखेची बरेच दिवस सुरु राहिली. त्यामुळे काँग्रेसच्या हातून सत्ता गेली.

राज्यभरातील महापालिका निवडणुकांमध्ये काँग्रेसची कामगिरी सुमार झाली. त्यात चंद्रपुररमध्ये काँग्रेसच्या नेत्यांनी असलेली संधी गमावली. आता या प्रकरणी खासदार प्रतिमा धानोरकर आणि आमदार विजय वडेट्टीवार यांची चौकशी केली जाणार आहे. त्यानंतर दोषींवर कारवाई होणार आहे. यासंदर्भात दिल्लीतील हायकमांडला अहवाल सोपवला जाईल.

मुंबईतील टिळक भवनात काँग्रेसची बैठक झाली. या बैठकीला महाराष्ट्राचे प्रभारी रमेश चेन्नीथला, प्रदेशाध्यक्ष हर्षवर्धन सपकाळ, विजय वडेट्टीवार आणि अन्य महत्त्वाचे नेते उपस्थित होते. या बैठकीत चंद्रपुरात झालेल्या अंतर्गत गटबाजीचा विषय उपस्थित झाला. गटबाजीमुळे महापालिकेतील सत्ता गेल्याबद्दल चर्चा झाली. या प्रकरणाच्या चौकशीचे आदेश देण्यात आले. त्याचा अहवाल दिल्लीला पाठवला जाणार आहे.