अंधेरीच्या सबवेला लागूनच मोगरा नाला वाहतो. उगम स्थळ ते अंधेरी सबवे हे अंतर अडीच किमीचे आहे. नाल्याच्या उगम स्थळापासून सबवेकडे येताना तब्बल १३ मीटरचा उतार आहे. त्यामुळे पाण्याचा प्रवाह जोरात येतो. भरतीच्या वेळी मोगरा नाल्याच्या पाण्याची पातळी वाढते. त्यालगत असलेल्या अंधेरी सबवे, दाऊद बाग, आझादनगर या परिसरात पूरसदृश्य परिस्थिती निर्माण होते. परिणामी अंधेरी सबवेतील वाहतूक पूर्णपणे बंद होते.

Mahim-Bandra Flyover: पश्चिम द्रुतगती मार्गावरील कोंडी फुटणार, खाडीवरील पुलामुळे दादर, खार, सांताक्रूझ प्रवाशांना दिलासा; पण तीन वर्षे पूल कागदावरच

रेल्वे पुलाखालून सबवे

त्यामुळे अंधेरी सबवेवरूनच उड्डाणपूल उभारणी करण्याचा पर्याय पूल विभाग, महापालिकेने निवडला आहे. वॉर्ड स्तरावरही याचे नियोजन होत आहे. मात्र, पूल उभारणीआधी त्याची व्यवहार्यता तपासली जाणार आहे. सबवेवरून पूल होऊ शकतो का, त्याची लांबी किती असावी, त्याचे बांधकाम करताना येणाऱ्या अडचणी, खर्च, पुलाचा फायदा, रेल्वे प्रशासनासह विविध परवानगी याचा व्यवहार्यता अहवाल तयार केला जाणार आहे. त्यासाठी सल्लागार नेमण्यात आल्याची माहिती सूत्रांनी दिली. अंधेरी पूर्व आणि पश्चिमेला जोडणारा सबवे स्थानकानजीक आहे. गोखले पुलालगत असलेला हा मार्ग रेल्वेच्या पुलाखालून जातो. सबवे असला तरी हा भुयारी मार्ग नाही.

मोगरा पंपिंग स्टेशनची प्रतीक्षा

पुराचा धोका टाळण्यासाठी महापालिकेकडून मोगरा पंपिंग स्टेशन उभारले जाणार आहे. मात्र, या पंपिंग स्टेशनसाठी प्रतीक्षाच करावी लागणार आहे. मोगरा पंपिंग स्टेशन कामासाठी महापालिकेने कार्यादेश दिले आहेत. तरीही केंद्रीय पर्यावरण विभागाची अंतिम मंजुरी अद्याप बाकी आहे. मोगरा पंपिंग स्टेशन अंधेरी पश्चिमेला लोखंडवाला कॉम्प्लेक्सच्या मागे पाणलोट क्षेत्रात हलविण्यात आले आहे. मात्र, उच्च न्यायालयात जमिनीच्या मालकीच्या मुद्द्यावरून सुरू असलेल्या कायदेशीर बाबींमुळे पंपिंग स्टेशनच्या उभारणीला विलंब झाला. मोगरा पंपिंग स्टेशनचा न्यायालयीन तिढा सुटला आहे.