मुंबई
मुंबई मेट्रो 3 मार्गिकेच्या तिकीटावर असणाऱ्या नावांवरुन नवा वाद उफाळण्याची शक्यता आहे. काही महिन्यांपूर्वीच या मेट्रो 3 मार्गिकेचं उद्घाटन झालं होतं. महायुती सरकारचा अतिशय महत्त्वकांक्षी असा हा प्रकल्प आहे. या मार्गिकेने हजारो प्रवासी दररोज प्रवास करतात. मेट्रो 3 मार्गिकेला ‘एक्वा लाईन’ असंही संबोधलं जातं. ही मेट्रो मार्गिका पूर्णपणे भूमिगत आहे. विशेष म्हणजे हा मेट्रो मार्ग तब्बल 33.5 किमी लांब आहे. कुलाबा-वांद्रे-सीप्जला जोडणारा हा मेट्रो मार्ग आहे. त्यामुळे प्रवाशांसाठी हा खूप सोयिस्कर मार्ग असल्याचं मानलं जातं. या मार्गावर तब्बल 26 भूमिगत मेट्रो स्टेशन आहेत. विशेष म्हणजे मिठी नदीच्या खालून जाणारी ही दुसरी मेट्रो मार्गिका आहे. अतिशय महत्त्वाची असणारी ही मेट्रो मार्गिका आता वेगळ्या कारणाने चर्चेत आली आली आहे. या मेट्रो मार्गिकेच्या दोन प्रमुख आणि महत्त्वाच्या मेट्रो स्थानकांवर देण्यात येणाऱ्या तिकीटांवर जे नाव नोंदवले जाते त्यावरुन नवा वाद निर्माण झाला आहे.
छत्रपती शिवाजी महाराज टर्मिनस मेट्रो स्थानक आणि जगन्नाथ शंकरशेट मेट्रो स्थानकांचा संपूर्ण उल्लेख तिकीटावर असणे अपेक्षित आहे. पण तसा उल्लेख न करता सीएसएम टर्मिनस मेट्रो आणि जेएसएस मेट्रो असा उल्लेख तिकीटावर केला जात असल्याने नामदार जगन्नाथ (नाना) शंकरशेट प्रतिष्ठानने नाराजी व्यक्त केली आहे. “छत्रपती शिवाजी महाराज हे महाराष्ट्राचे आराध्य दैवत आहेत. तर जगन्नाथ शंकरशेट यांचा मुंबईच्या जडणघडणीत मोलाचा वाटा आहे. या दोन्ही महापुरुषांच्या नावाचा तिकीटावर सीएसएम टर्मिनस मेट्रो आणि जेएसएस मेट्रो असा उल्लेख करणे हा त्यांचा अपमान आहे. तो कदापि सहन केला जाणार नाही”, असा इशारा नामदार जगन्नाथ (नाना) शंकरशेट प्रतिष्ठानचे सरचिटणीस ॲड. मनमोहन चोणकर यांनी दिला आहे.