घरासमोरच दोघांकडून सुनील माळी यांच्यावर हल्ला

सुनील माळी राहत असलेल्या कलानगर येथील घरासमोरच दोघा हल्लेखोरांकडून माळी यांच्यावर चाकूने हल्ला करण्यात आल्याची माहिती आहे. या हल्ल्यात सुनील माळी यांच्या फुफ्फुसामध्ये चाकू अडकल्याने ते गंभीर जखमी झाले आहेत. त्यांच्यावर सांगलीच्या खाजगी रुग्णालयामध्ये उपचार सुरू असून माळी यांच्या प्रकृती चिंताजनक असल्याची माहिती आहे. दरम्यान, माळी यांच्यावर हा हल्ला कोणत्या कारणातून करण्यात आला, हे अद्याप स्पष्ट झाले नसून, हल्ल्याप्रकरणी सांगली शहर पोलिसांकडून तपास सुरू करण्यात आला आहे.

दुचाकीवरुन खाली उतरताच केला हल्ला

सुनील माळी हे कुटुंबीयांसह कलानगर येथे राहतात. महापालिकेचे ते मुख्य अग्निशमन अधिकारी म्हणून काम करतात. माळी दिवसभर कामावर होते. सायंकाळी ते मित्रासोबत दुचाकीवरून घरी निघाले होते. यावेळी त्यांच्या घराजवळ दुचाकीवरून आलेले दोन हल्लेखोर दबा धरून बसले होते. माळी हे दुचाकीवरून उतरताच हल्लेखोरांनी त्यांच्याजवळ असलेल्या चाकूने त्यांच्या पोटात उजव्या बाजूला वार केले. वार करताच तो चाकू त्यांच्या पोटातच अडकला. यावेळी माळी यांच्या मित्रांनी आरडाओरडा केल्यानंतर संशयित हल्लेखोरांनी घटनास्थळावरून पळ काढला.

हल्ल्यानंतर माळी यांच्या मित्रानं टिंबर एरियातील एका खाजगी रुग्णालयात त्यांना उपचारासाठी दाखल केले असून त्याची प्रकृती चिंताजनक असल्याची माहिती आहे.

शहरामध्ये गेल्या काही दिवसांपासून गुन्हेगारीमध्ये वाढ झाल्याचे दिसून येत आहे, नवीन वर्षाच्या सुरुवातीलाच सांगलीमध्ये एका युवकाचा धारदार शस्त्राने वार करून खून करण्यात आला होता. काही दिवसातच दोन खुनाच्या घटनेने सांगली हादरून गेली होती. कालच किरकोळ वादातून एका युवकाचा खून करण्यात आला होता. आज थेट शासकीय अधिकाऱ्यावर हल्ला झाल्याने एकच खळबळ उडाली आहे. पोलिसांनी कडक कारवाई करावी अशी मागणी आता केली जात आहे.